LESOLE LE KOETETSOE LE KOLOI
Ka moqolotsi oa rona
La 2 Tšitoe 2023
Sepolesa se batlana le baahi ba Lesotho ba qetetseng ho bonoa ba na le lesole la Afrika Boroa leo esale le nyamela mafelong a Mphalane 2023. Pelaelo ea sepolesa ke hore lesole leo le koetetsoe.
Tlaleho ea sepolesa sa Afrika Boroa, e supa hore ka la 31 Mphalane 2023, lelapa la setho sa sesole sa Afrika Boroa, Lethusang Azael Fothoane le tlalehile a nyametse.
Lelapa le re Fothoane o ne a tlohe lapeng ha hae Chris-Hani, Bloemfontein a ea mosebetsing a qhoba koloi ea hae ea moetso oa Toyota Fortuner e ts’oeu. Lelapa le re ha a ka ba hlola a khutletse hae ho tloha ka nako eo.
Ho sa le joalo, lipatlisiso tsa sepolesa li re lesole lena le qetetsoe ho bonoa Wepener, Free State moo le neng le lula, le na le Lefa Mabasa ea tlalehoang e le motho oa Mazenod, Maseru. Hape o qetetsoe a na le motho ea bitsoang Matšeli ea tummeng ka lebitso la Qoqotho hammoho le mosali e mong ea bitsoang Lerato ea hlalosoang a le mosesane a le motšoana ka lebala.
Sepolesa se re junifomo ea Fothoane ea sesole, ID ea hae, sepache le nomoro-polata ea koloi ea hae li fumanoe Mazenod, Lesotho. Koloi eona esale e nyamela hammoho le monga eona.
Sepolesa se kopa mang kapa mang ea ka bang le leseli ka bo-Lebasa ho se tsebisa hore ba tlo se thusa ka lipatlisiso.
Motho mang kapa mang ea ka bonang koloi ea Fothoane hammoho le eena a se tsebise kapa a letsetse mapolesa a latelang: Colonel Bolsiek ho 082 466 8530, Captain Mojaki ho 082 553 7639 kapa Warrant Officer Thekiso ho 072 135 8334 kapa a letsetse Crime Stop ho 08600 10111.
