LEPOSA E ABELA MOFOKENG MOSEBETSI HAPE
La 24 Tlhakubele 2023
Komiti e kholo ea Mokhatlo oa Mapolesa Lesotho, Police Staff Association (LEPOSA) e re e entse qeto ea ho beha lepolesa le lelekuoeng sepoleseng ebile le le palehong, monghali Motlatsi Mofokeng ho sebetsa e le raliphatlatso oa LEPOSA hape-hape.
Ho ea ka lengolo la LEPOSA le ngotsoeng kajeno, Mofokeng o tla sebetsa e le phala nako ea lilemo tse tharo e leng ho tloha ka Tlhakubele 2023 ho isa Tlhakubele 2026.
“U lebeletsoe ho qala mosebetsi hang-hang ha u fumana lengolo lena. Re nka monyetla ona ho u lakaletsa mahlohonolo tšebetsong ea hau e nang le liqholotso.” Lengolo la LEPOSA le tekenetsoeng ke mongoli-kakaretso, ‘Makatleho Mphetho le ngotsoe joalo.
Ho sa le joalo, ho bile le mabare-bare a hore Mofokeng o tla khutlela mosebetsing kamora hore mookameli oa sepolesa, Holomo Molibeli a bope khotso le mokhatlo oa LEPOSA. Ha ho tsebahale hore na Mofokeng o tla khutlela mosebetsing neng.
