LEKALA LE TŠOARA THUPELO KA LI-SDG
Ka Moipone Makhemeng
La 17 Loetse 2023
Lekala la Lichelete le Meralo ka tšehetso ea Mokhatlo oa Machaba a Kopaneng oa Ntlafatso (United Nations Development Programme – UNDP) le bile le thupelo Maseru, Avani bekeng ena mabapi le ho buisana ka Meoloane ea Ntšetsopele ea Moshoelella (Sustainable Development Goals – SDGs).
Sepheo e bile ho sebelisa mahlale a limmaraka molemong oa ho thusa lekala ho tseba mebaraka ea bohlokoa ea botseteli e ka hlahang e na le menyetla e meholo e tsamaellanang le litlhoko tsa ‘muso ho ntšetsa naha pele.
Mongoli e Moholo oa Lekala la Lichelete le Meralo, Nthoateng Lebona ha a thakhola mosebetsi oa letsatsi o lebisitse liteboho tsa hae ho mekhatlo ea machaba ka tšehetso ea lichelete molemong oa ho ntlafatsa Lesotho.
Ba bileng le seabo phuthehong
O re lithuso tsa lichelete li fanoa molemong oa ntšetso-pele ea meoloane ea moshoelella ho khothaletsa moralo o kopanetsoeng ho fihlela meoloane ena.
Lebona o bontšitse hore ‘moka oo ke letšoao le leng la bohlokoa la ho matlafatsa likamano tsa nako e telele lipakeng tsa ‘Muso oa Lesotho le Mokhatlo oa Machaba a Kopaneng.
A supa hore ka selemo sa 2020 ‘muso ka tšehetso ea UNDP o ile oa etsa Tlhahlobo ea Lichelete ea Ntšetsopele (Development Finance Assessment – DFA). O hlalositse DFA e le semetho sa ho qala tšebetso ea mekhahlelo e mene e Kopanetsoeng ea naha ea Lichelete (Integrated National Financing Framework – INFF).
A re INFF e fana ka setšoantšo se pharaletseng sa boemo ba lichelete ntšetso-peleng le ho supa mefokolo le menyetla ea ho fana ka tsebo ea ntlafatso ea lichelete le ntšetso-pele le maano. Tabeng eo, DFA Lesotho e hlahlobile maoala, maano le mekhatlo e teng ea ‘muso ea lichelete. Ho ile hoa hloauoa mesebetsi le boikarabello bo itseng ho ba nang le seabo sa bohlokoa ho phethahatsa likhothaletso tsa DFA.
Ha a kena litabeng tsa SDGs, o itse; “Moralo oa batseteli ka litaba tsa SDGs ke ho shebana le mebaraka ho thusa bo-ramatsete ba ikemetseng ho tseba menyetla ea matsete le mekhoa ea khoebo e thusang ho sebetsana le litlhoko tsa ntlafatso ea naha. Sena ke ho ntšetsa-pele lintho tse tlang pele ho naha le ho ntšetsa-pele litaba-tabelo tsa ho fihlela meoloane ena.
“Meralo e tla fana ka leseli la lisebelisoa tse hlokoang ke mafapha a ikemetseng ho eketsa matsete a bona ho li-SDG ‘me ba ka kenya letsoho haholo ho tlatseletsa lichelete. Meralo ea botseteli ea SDGs e tlatselitsoe hape ka tlhahlobo e potlakileng ea bokhoni ba mafapha a ikemetseng.
“Ke tle ke hopotse hape hore mosebetsi ona o reretsoe ho tšehetsa ‘muso oa Lesotho hore o fihlele karolo ea bobeli ea NSDP e leng ho khothaletsa kholo ea moruo e kenyelletsang bohle le meoloane ea moshoelella.
“Mafapha a ikemetseng a etelletsoe pele ke tlhahiso ea mesebetsi; le sephetho sa boraro sa UNDAF se bolela hore ka 2023 ‘muso le mafapha a ikemetseng a lokela ho eketsa menyetla ea kholo ea moruo e kenyelletsang le e tsitsitseng ho ntlafatsa kanetso ea lijo le mesebetsi ea bohlokoa bakeng sa bohle. Sena se tobile haholo-holo basali, bacha le batho ba nang le bokooa, ka ho thusa ho theha sethala se setle sa maano, ho bula sethala sa lipuisano le ho hlahisa bopaki sebakeng sa lipuisano tsa lekunutu.”
Ho sa le joalo, motlatsi oa moemeli oa UNDP, Nessie Golakai Gould, o bontšitse hore naha ea Lesotho ke hona e ntseng e hlaphoheloa ho nyotobeleng hoa moruo o ileng oa bakoa ke seoa sa Covid-19. Gould o re meoloane ea moshoelella e tlo thusa kholisong ea moruo. Ho feta mona, o hlalositse hore tšebetso ea bo-ramatsete e tla thusa ‘muso ho holisa boqapi le mahlale phehlong ea motlakase, ho holisa bohahlauli le bohlahisi.
Nessie Golakai Gould, motlatsi oa moemeli oa UNDP, Lesotho
O hlalosa hore tšebetso ea moralo oa li-SDG e boetse e lebelletsoe ho thakela ‘muso ka malebela tlhahiso-leseling e hlokahalang mabapi le ntšetso-pele ekasitana le matsete a tla thusa ho bokella le ho tsamaisa matsete a mafapha a ikemetseng molemong oa SDGs. Gould o totobalitse hore lithuso tsa lichelete ho hlaha mafapheng a fapaneng li tlo thusa ‘muso oa Lesotho ho hlasimoloha moruong.
Ka lehlakoreng le leng, ea ts’oereng molepo e le mookameli e moholo oa Koporasi ea Naha ea Ntšetso-pele ea Moruo (Lesotho National Development Corporation – LNDC), Adv. Molise Ramaili o ile a arolelana le ba tlileng kopanong litaba tsa khoebo ea Lesotho le lefatše ‘me a supa hore ba tsepamisitse maikutlo holim’a tataiso ea thepa e tsoelang ka ntle ho naha (exports).
Adv. Molise Ramaili, ea ts’oereng molepo e le mookameli e moholo oa LNDC
Har’a tsona o hlalositse khoebo ea Lesotho le Afrika Boroa ka le reng Lesotho le pota-potiloe ke Afrika Boroa ka hona le tla etsa mesebetsi e mengata le eona. O itse hajoale ba sebetsa ka phehlo ea motlakase moo ba shebaneng le lik’hamphani tse kang Cryptic le Cement tse seng ntse li sebetsa ka har’a naha. Mona o lotomantse hore ba ntse ba sebetsa ka mechini ea motlakase, lisebelisoa tsa oona joalo joalo.
Ho tloha moo, o ile a supa hore khoebo ea tlhahiso ea liphahlo lifemeng tsa Lesotho e fepela lik’hamphani tse kholo joaloka Jet, Pep le tse ling hammoho le lieta. O boetse a kenyeletsa lihlahisoa tsa thitelo moo a bontšitseng hore ba sebetsa ka kotloloholo le Maluti Mountain Brewery.
Ramaili o teketse phutheho hore lihlahisoa tse ka sehloohong tse romelloang ka ntle ho naha ke metsi le litaemane hara tse ling. Ha a bua ka metsi o tobokelitse hore Lesotho le fepela Afrika Boroa ka metsi. A re takatso ea bona ke ho bona Lesotho le boela le fepela linaha tse kang Dubai le Germany ka metsi. O bontšitse hape hore ba ntse ba sebetsana le ho fehla motlakase ka metsi ka sepheo sa ho fepela Afrika Boroa ka oona.
Ho sa le joalo, taba e ‘ngoe eo Ramaili a ileng a e beha ke hore litaemane tsa Lesotho li fantisoa Amerika le linaheng tsa Eoropa haholo Belgium. O itse ba na le morero oa ho theha liporojeke tsa ho li rekisa li le joalo molemong oa hore li rekoe ka chelete e ntle.
