LEBONE LA TSOSOLOSO LE TLA POTOLOHA LE LITEREKE
Ka Moipone Makhemeng
La 12 Tšitoe 2023
Isao naha ea Lesotho e tla keteka lilemo tse 200 e thehiloe ke Morena Moshoeshoe kaha a ile a e theha ka 1824, nakong eo a neng a falla ho tloha Menkhoaneng ho leba qhobosheaneng, Thaba-Bosiu.
E le ho kena leetong la keteko ena, ka la 23 Pulungoana 2023, Motletlehi Letsie III o ile a bonesa lebone la tsosoloso Ntlong ea Borena bo Boholo Maseru. Lebone la Tsosoloso ke morero oa Project Re- le mafapha a mang e le tlatsetso leetong la keteko ea lilemo tse 200 sechaba sa Basotho se thehiloe.
Motlotlehi kamora ho khantša lebone o ile a etsa puo e matla moo a ileng a ipiletsa ho sechaba ho khutlela metheong ea Morena Moshoeshoe:
“Rea tseba hore karolo e kholo ea sechaba e tšoenyehile ke maemo a hlobaetsang ao Basotho ba phelang kahara ‘ona letsatsi le letsatsi. Lesotho fatše la bo-ntat’a rona le fetohile lefatše la lipolao; naha ea lintoa, naha ea likarohano le litlhoriso. Re hlobotse seriti le boleng ba rona. Ka ho khantša lebone lena la tsosoloso re rapela Molimo hore a re bontše tsela eo ka eona re ka khutlelang metheong ea rona re le sechaba sa Moshoeshoe; e leng metheo ea khotso le lerato.”
Motlotlehi o entse boipiletso joalo a bile a thatiselletsa ka hore ke nako e telele re le Basotho re fosetsa Molimo le balimo ka lebaka la boitšoaro ba rona.
Lebone la Tsosoloso
A re ke nako ea ho lokisa bobe ba rona, ho phetloe leqephe le lecha. A re ke nako ea ho ikoahlaea kapele ho Molimo re kope tšoarelo. A boela a re o ipiletsa ho ‘muso, marena, likereke le bapolotiki ho ithukhubetsa leetong la tsosoloso. O ile a phethela puo ka ho ipiletsa ho re lebone la tsosoloso le leleke lefifi ho Basotho, a bile a kopa ho Molimo hore le hlahise leseli le lecha ka sepheo sa ho fetoha Lesotho le lecha.
Ho sa le joalo maobane mokhatlo oa Project Re- o bile le ‘moka oa baqolotsi ‘Manthabiseng Convention Centre, Maseru.
Sepheo sa ‘moka e bile ho fana ka tlaleho litlhopisong tse ntseng li tsoela-pele hore lebone le tle le potolohe le litereke kaofela ka molaetsa o reng “KE NAKO EA TSOSOLOSO, NAKO EA LESOTHO LE LECHA!”
Ho ea ka tlhaloso ea mookameli oa Project Re-, monghali Solly Mofoka phatlalatsong ea bo-ralitaba, o bontšitse hore leeto la lebone le tla simolla mafelo a Pherekhong 2024 seterekeng sa Butha Buthe. Lebone le tla khutlela seterekeng sa Maseru ka Mphalane 2024.
Talima lethathamo ka tlaase ho bona leeto la lebone.
Lebone le tla nka matsatsi a mararo seterekeng ka ‘ngoe moo le tlang ho amoheloa ke baetapele le sechaba ka mekete ea bochaba e tsamaeang le thapelo.
“Kahona, memo e ea ho basali le baroetsana ba Basotho, esitana le sechaba sohle hore ka Moqebelo oa la 16 Tšitoe 2023, re keneng mokolokong oa thapelo ’moho, setereke ka setereke, re apere bosoeu bo supang KHOTSO, QALO-BOCHA le TŠEHETSO ho Motlotlehi Hlooho ea naha, ea seng a thakhotse leeto la tsosoloso ea Basotho le Lesotho, a bile a supile tsela le ho ipiletsa ho rona sechaba hore re eme ‘moho, re sebeletse ho fetoha Lesotho le Lecha e le ka ’nete le tieo.” Mofoka oa hlalosa.
O boetse a supa hore mekoloko e tla qala ka hora ea botšelela hoseng literekeng tsohle. Ka Moqebelo oa la 16 Tšitoe 2023. Boipiletso ba hae e bile hore boeta-pele bo kahare ho litereke bo ananela memo ena.
“Re boetse re tsebisa sachaba sohle hore tlas’a tšebetso ea Project Re- ea tsosoloso, ka kopanelo le Mongoli oa ‘Muso le Lekala la Bohahlauli le Bochaba, ho tla tšoaroa phutheho ea mekhatlo, litsi le mafapha a ka sehlohlolong tokisetsong ea ho tla keteka lilemo tse 200 tsa boteng ba sechaba sa Basotho, e le moo ho tlo boptjoa moelelo le tumellano ‘moho ea ho keteka nako ena e bohlokoa re ipapisitse le khoelehetso ea Motlotlehi, e reng; ‘Re qala hona mona, ‘moho re fetoha Lesotho le Lecha.” Mofoka o fera joalo.
Ho sa le joalo mofumahali, mookameli oa Morija Museum and Archives, ‘Mamokoena Makhetha o fane ka tlhaloso mabapi le hore lebone la tsosoloso le ahiloe joang mohlang le neng le bonesoa ke Rabasotho.
Makhetha o hlalositse hore lebone le ahiloe ka kopanelo le Project Re-, Morija Museum and Archives le Lesotho Smart Partnership Hub ofising ea tona-kholo. A re lebone le ahiloe ke monghali Karabo Mahapeloa setloholo sa mofu Joshua Pulomo Mohapeloa eo e neng e le seqapi sa ‘mino oa lithallere.
A re lebone le sebopeho sa lenaka la tšukulu. O re ba sebelisitse lenaka la tšukulo hobane le nkoa e le letšoao la matla. A teha mohlala ka hore kotjane ea Morena Moshoeshoe e ne e entsoe ka lenaka la tšukulu.
