LDF E SHANOTSA HO AMOHA MAPARAMENTE LITHUNYA
Ka Moipone Makhemeng
La 19 ‘Mesa 2023
Kamora lerata le ileng la matha ho marang-rang hore litho tsa paramente li amohuoe lithunya ke sesole, koranta ena e ile ea atamela phala ea sesole, Lieutenant Colonel Sakeng Lekoala ho hlahisa lehlakore la bona.
Lit. Colonel Lekola o hlalositse hore taba ena ha e na ‘nete hohang. “Ha ho na le ha e le leparamente le le leng le ka hlahang mona le bontša hore le nketsoe sethunya.”
O tsoela-pele: “Ho mpang ho le teng ke hore ho na le letšolo le bileng teng le ntseng le tsoela-pele hona joale moo re ntseng re phahla lintho tse ngata ho kenyeletsa le tsona lithunya.”
Ha a hlalosa se susumelitseng letšolo lena o itse boemo ba botlokotsebe bo holimo haholo kahara naha. Lekola o totobalitse hore letšolo lena ha le ee ka tšobotsi ho hang kaha le ea akaretsa ho bohle.
Mohlomphehi Machesetsa Mofomobe o re masole a nkile sethunya sa molebeli oa hae
O supile hore mautloela a tla sibolla taba ebe kamorao ho nkoa likhato tsa molao.
Le ha ho le joalo, Mohlomphehi Mofomobe Machesetsa e le setho sa paramente ebile e le moetapele oa Basotho National Party (BNP) o re molebeli oa hae o nketsoe sethunya ka Sontaha ke sesole.
Mofomobe o re e ne e le Sontaha a tsoa sebokeng sa mokha oa habo Butha-Buthe. O hlalosa a ile a kopana le masole a e entse thibella Ha Foso ‘me ba emisa koloi ea hae ba nt’o batla ho mo secha empa o re o ile. Ke moo ba ileng ba mo botsa hore na ka koloing o na le sethunya na ‘me eena a fetola ka hore molebeli oa hae o na le sona.
“Ba ile ba se hlahloba sethunya seno ‘moho le litokomane tsa teng eaba ba se nka ba hlolosa hore ke tla se fumana maponeseng Mantaha. Ke mathile sepoleseng ho tloha Mantaha empa hofihlela kajeno ha ho na sethunya se joalo. Ke se bile ke tsoa kopana le akhente ea ka ke qosa sesole hore se lokolle sethunya seno.” Mohlomphehi Mofomobe o li beha joalo.
Ha a fera o bontšitse ha ho se na letšolo le teng empa masole a rata ho ipata ka ho re ba na le lona. O re ba ile ba bolaea ngoana oa batho (Maaparankoe Mahao) nako ea ho feta ba ntse ba le tlasa sekhele sa letšolo.
