LDF E NEHELANA KA MOAHO HO SENATE
Ka Moipone Makhemeng
La 23 Tlhakubele 2023
Maobane mookameli oa Sesole sa Lesotho (LDF), Lieutenant General Mojalefa Letsoela ka tšehetso ea Lekala la Molao Lefapheng la Litlhopho-Bocha (National Reforms Authority – NRA), o nehelane ka moaho oa matloana le ntlo ea lijo paramenteng ea khale kaha LDF e phethetse mosebetsi oa ho nchafatsa moaho oo kamora hore o che lore! ka la 21 Motšeanong 2021.
Mohlomphehi Au le Lit. General Letsoela
Mof. Lephoma le WO I Khabele
Mong. Rets'elisitsoe Mohale, Mongoli e Moholo oa Lekala la Mesebetsi e Meholo
Adv. Ts'eliso Molise - Mongoli e Moholo oa Senate
Litho tsa Sesole
Ba neng ba lebeletse
Warrant Officer I Mofolo Khabele
Matloana a Senate kamor'a ho cha
Moaho oa matloana o nchafalitsoeng
Molaoli oa Sesole, Lieutanant General Letsoela puong ea hae ha a nehelana ka moaho o isitse liteboho ho batataisi ka tšehetso eo ba faneng ka eona; ka ho otloloha o lebisitse liteboho ho Procurement Officer Lekaleng la Tšireletso Mofumahali Nomabandla Lephoma ka ho ba le tšebelisano-‘moho ho sebetsa ka matla katlehisong ea tšebetso ena.
Ha a tsoela-pele Letsoela o bontšitse hore thomo e phethiloe ‘me ha ba lebella phaello e le sesole empa temoho. A re ba na le mosebetsi o mongata oo ba lokelang ho o fetisetsa sechabeng empa ba hloka lisebelisoa. A supa hore boiketlo le likhothatso tsa sechaba li mahetleng a bona.
Ho sa le joalo, Motlatsi oa Mookameli oa Ntlo ea Senate, Mohlomphehi Tsukutlane Au puong ea hae ha a amohela moaho, o isitse liteboho ho Sesole sa Lesotho ka ntlafatso eo ba e entseng eo a e babalitseng hore e entsoe ka makhethe a hlollang. Au o boetse a leboha Sesole kaha a supile hore kamora hore moaho oa matloana o sale o le lesupi ke mollo, ho ile hoa ba le tlhokahalo ea matloana empa LDF e ile ea thusetsa ka matsapa a hore ho be le matloana a nakoana hore mosebetsi oa boithuso o ‘ne o tsoele-pele sebakeng seo.
A re haele mona ba qetile ho tsosa le ho nchafatsa moaho ona bahlomphehi ba tla ba sehlahlo le mafolofolo mosebetsing oa bona oa ho etsa melao. O re ha ho le joalo tlhahiso e tla ba ntle haholo kaha sebaka seo ba tlil’o sebeletsa ho sona hajoale se le makhethe kaha nako e fetileng ho ne ho ena le hore ba thulane le poho e se ntse e matha e tlotse.
Khabareng, sesole le sona ka Warrant Officer I Mofolo Khabele se ile sa amohela thepa ea tšebetso joalo ka likiribae, leri le tse ling ho tsoa ho Lekala la Molao Lefapheng la Litlhopho-Bocha.
