LDF E LOKOLLA BACHA KOETLISONG

LDF E LOKOLLA BACHA KOETLISONG

Leihlo la Basotho

Morero oa Lesotho Defence Force ho otla le ho rupela bacha ka sepheo sa ho ba ruta boitšoaro ekasitana le ho ba kenya lerato la naha o ntse o tsoela-pele ka katleho. Kajeno mokhahlelo oa bone oa bacha o ile oa tšoareloa mokete liahelong tsa sesole, Makoanyane kamora ho phethela koetliso ea libeke tse tharo.

Bacha ba koetlisitsoeng ke LDF

Ke kakaretso ea bacha ba 147 ba bileng koetlisong ena e leng bahlankana ba 98 le baroetsana ba 49.

BOHA POKELLO EA LITŠOANTŠO QETELLONG EA LITABA TSENA.

Ha a bua tšebeletsong ena, e mong oa batsoali o ile a leboha LDF ka ho fa bana ba bona monyetla oa ho fuoa likoetliso ke sesole. A re takatso ea hae ke hore batsoali bohle le ba se nang bokhoni ba ho lefella bana ba bona ho tla likoetlisong ho mpe ho be bobebe hore le bona bana ba bona ba fuoe monyetla.

Molaoli oa sesole, Leutenant General, Mojalefa Letsoela o ile a leboha bakoetlisi le bahlokomeli ba bana ‘me ka ho khetholoha a leboha Major Melato e leng mokoetlisi ea ka sehloohong oa bacha. Letsoela o bile a leboha batsoali ka ho ba tšepela mosebetsi oa ho otla bana.

O boetse a leboha bahoebi ba tšehelitseng morero ona. A re leha ba kopana le liqholotso mona le mane empa tšebetso e ntse e tsamaea hantle.

“Mosebetsi oa rona ke ho supisa bana bana leseli la tsela. Re batla ba kene bophelong bo bocha. Taba ea kholiso ea ngoana ha se ea motsoali feela empa ke ea rona batho ba sebaka ka ho pharalla. Ngoana ke oa sechaba ekasitana le ho ea likerekeng, ho baprista. Rea tseba batsoali malapeng le iteratelletse ka marako le li-devils’ fork malapeng a lona empa ha lea lokela ho re imetsa hoba rea ameha le rona.

“Ha ho ka moo re ka bang le masole a kamoso ha bana bana ba sa nepahala. Le mapolesa re ke ke ra ba le ‘ona haeba bana ba sa nepahala.

“Re batla hore re le sesole sa Lesotho lipheo tsa rona li pharalle hohle ‘me re hopola hore re lokela ho tšoarisana le sechaba. Bana bana ba hloka lerato le boitlhompho hoba ba tseba lea ba rata le le batsoali ba bona.

“Tsamaeang le tsoele-pele, ‘me le tle le be letsoai la moo le eang teng ‘me le se lebale hore ha bo-lona ke hona Makoanyane mona haeba litaba li ka thatafala. ” Lit. General Letsoela o laile bacha joalo.

Moketeng ona ho bile teng batsoali, liofisiri tse kholo tsa sesole le bahlomphehi matona a ‘muso oa Motlotlehi a kenyeletsang Lebona Lephema, letona la Puso ea Libaka le Borena, Lekala la Lehae le Sepolesa; Mokhethi Shelile, letona la Khoebo le Mesebetsi e Moholo, Ntlafatso ea Khoebo le Bohahlaoli; Lejone Mpotjoane letona la Lekala la Machabeng le Limpho Tau, letona ofising ea tona-kholo.

BOHA POKELLO EA LITŠOANTŠO E EA LATELA: