LDF E LATOLA TELEKO EA MOLAOLI
Ka Moipone Makhemeng
Leihlo la Basotho, la 24 ‘Mesa 2023
Mookameli oa Sesole sa Lesotho, Lieutenant General Mojalefa Letsoela o ile a hlomamisoa e le molaoli ka la 23 Pherekhong 2018 kamora merusu e bileng ka sesoleng lilemong tsa bo-2014 ho isa 2017. Lilemong tseo seriti se setle sa sesole se ile sa bonahala se thunthetseha kaha ho bile hoa etsahala liketsahalo tse bolutu ha masole a thunya le ho bolaea Brigadier Maaparankoe Mahao ka la 25 Phuptjane 2015.
Ho boetse hoa ba le ketsahalo e ’ngoe moo masole a mabeli a neng a tlalehoe a ile a kena ofising ea molaoli oa mehleng, Lieutenant General Khoantle Motšotso-motšo a mo thunya a ’molaea ka la 5 Loetse 2017. Ke hona ketsahalong eo moo balebeli ba molaoli ba neng ba arabele ka ho bolaea masole a mabeli ao – bafu Bulane Sechele le Tefo Hashatsi.
Kamora lefu la Lieutenant General Motšotso-Motšo ’muso o ne o hlomamise molaoli oa kajeno, Lieutenant General Letsoela eo tšebetso ea hae e pakoang ke machaba ka ho tsoa matsoho kaha seriti sa sesole se khutlile ‘me SADC e bile ea kopa hore sesole sa Lesotho se lebe Mozambique ho ea thusetsa toantšong ea marabele.
Ho sa le joalo ho na le menyenyetsi e ntseng e matha ho marangrang hore ’muso oa tona-kholo Sam Matekane o lelekile molaoli Letsolela kapa ho mo behella ka thoko ho mosebetsi. Koranta ea Leihlo la Basotho e roetse lieta ea ikisa ka seqo ofising ea raliphatlalatso oa sesole Lieutenant Colonel Sakeng Lekola ‘me eena o latotse menyenyetsi ena a re ha e na ’nete.
“They are unfounded lies. This is my first time to hear of these rumours. Hona ha se menyenyetsi ke mashano.” Lieutenant Colonel Lekola o arabile joalo.
Ho sa le joalo, moqolotsi o ile a ‘motsa hore ho ka hlaha tabahali e kana-kana joang e-se-be ha ho mosi o ka qobang feela ho se mollo. Eena a mo fetola: “Ha ke tsebe, ke utloa ke sa tsebe le sepheo sa leshano le tjena. Hona ke leshano le nts’ang tonki ea poho tšimong. Le ntšang moruti ka kerekeng a ntse a rapela.” Lieutenant Colonel Lekola o arabile joalo o phethetse karabo ea hae joalo. Phala ea tona-kholo le eona e nontsoe maikutlo:
Lieutenant Colonel Sakeng Lekola [Foto: The post]
