LCA E KOALA SEEA-LE-MOEA
Ka moqolotsi oa rona
La 2 Tšitoe 2023
Setsi sa Taolo ea Khaso (Lesotho Communication Authority – LCA) se re se fihletse qeto ea ho koala nakoana seea-le-moea sa People on the Move Radio (PMR) se hasang se le Maseru. LCA e re PMR e tla hakolloa moeeng ho tloha ka la 1 Tšitoe 2023 ka lebaka la ho roba lipehelo tsa molao tsa khaso.
“Qeto ena e latela hore PMR e hlolehe ho ikobela temana ea 26 (3) ea tsamaiso ea khaso hammoho le lipehelo tsa lakesense ea eona tse hlokang hore seea-le-moea se be le mochini o hatisang mananeo nako eohle le ho a boloka nako ea likhoeli tse tharo.” Polelo ea LCA, e tekenetsoeng ke raliphatlalatso Mothepane Kotele e rialo.
LCA e supa hape hore ha seea-le-moea se hloleha ho boloka likhatiso tsa mananeo, seo ke tlolo ea molao kaha seea-le-moea se tla sitoa ho fana ka likhatiso haeba ho ka ba le motho ea tletlebang ka mananeo.
Ho feta mona, LCA e re PMR ke seea-le-moea se sa tsotelleng kaha liofisiri tsa LCA li kile tsa etela liphaposing tsa seea-le-moea ka la 29 le 30 Tlhakubele ekasitana le ka la 3 ‘Mesa 2023 ‘me tsa makala ha li fumana ka ntlong ea khaso ho sa notleloa ebile ho se motho.
“Ka la 30 Tlhakubele 2023, LCA e ile ea kopa hore PMR e fane ka likhatiso tsa mananeo a ho tloha la 13 ho isa la 24 Tlhakubele 2023. PMR e ile ea iphapanyetsa kopo ena leha re lekile ka makhetlo ho ba hopotsa. Ka lebaka leo, PMR e ile ea ahloloa eaba ea laeloa ho emisa hang-hang mananeo a litaba hammoho le ao bamameli ba letsetsang seea-lemoeeng.” Polelo ea LCA e rialo.
Ka khoeli ea Phato, LCA e re PMR e ile ea ba ngolla e ba tsebisa hore mochini o hatisang mananeo o se o le teng. Ke moo LCA e ileng ea etela seea-le-moea ho netefetsa seo empa liofisiri tsa LCA tsa fumana ho se mochini o joalo.
Ka Pulungoana, LCA e re e boetse ea etela moo ea fumana ho ntse ho se mochini o hatisang leha PMR e bontšitse e o rekile.
Ho sa le joalo, liteko tsa ho fumana lehlakore la bookameli ba seea-le-moea sena li hlolehile kaha mothehi oa sona, Moruti Ben Mosala h’a ka fumaneha mohaleng oa hae.
