KOAE-EA-MAKHOABA E BOLAEA MOTHO HAPE BEREA
Ka Moipone Makhemeng
La 13 ‘Mesa 2023
Leha Lekala la Bophelo le ile la lokolla tlhokomeliso ea hore koae-ea-makhoaba (khoaeane kapa wild mushroom) ea naha e kotsi kaha e bakile mafu a batho ba ileng ba e ja ho boetse ho hlahile tsietsi e ‘ngoe hape.
Litlaleho tsa morao-rao li re ho na le ngoana ea timelletseng sepetleleng sa Sehopotso sa Mofumahali ‘Mamohato kamora ho ja koae-ea-makhaoaba Makola, Ha Majara, Berea.
Pejana Lekala la Bophelo ngoahola le ile la hlalosa hore Butha-Buthe ke bakuli ba robeli ba ileng ba kena lipetlele kamora ho ja sena, ‘me ke ba bararo ba ileng ba timela.
Ho sale joalo, selemong sena khoeling e fetileng ke litlaleho tse tharo tsa Ha Nkhahle, Qacha’s Nek tsa bana ba tlalehiloeng ba kene sepetlele ka lebaka la semela sena athe khoeling ena ke litlaleho tse peli ho hlaha Butha-Buthe le tse ling Leribe tsa batho ba ileng ba hlokahala ke chefu ea khoaeane.
Leihlo la Basotho le buisane le raliphatlalatso Lekaleng la Bophelo, Mofumahali ‘Mamolise Falatsa ea ipilelitseng ho sechaba ho ela hloko kotsi ea semela sena kaha a bontšitse hore litlaleho li kena li le sekhahla tsa batho ba kulang ka lebaka la ho ja khoaeane.
Falatsa o re e le lekala ba entse mosebetsi oa bona ho fetisetsa molaetsa sechabeng ka bophatlalatsi empa o hlokomela hore molaetsa ha oa pharalla hantle.
“Re kopa bophatlalatsi bo etse lerata ka kotsi ena hoba rona re le lekala re ke ke ra ba hohle empa bophatlalatsi bona bo fihlella hohle.” O rialo Falatsa.
Ha boemo bo le tjena, mofumahali Falatsa o re ba tlameha ho ithera le bo-mphato oa bona ho leba metseng e le ho ea jala molaetsa le tlhokomeliso ka matla ho fenya kotsi e bonahalang e ja setsi ea khoaeana ena.
O bontšitse hore ka chebo ea hae, ba loketse ho etela metseng ka mekhoa ea ho epa lipitso, hape ba lebe likolong ka ho fapana ho fana ka thuto ka kotsi ea koae-ea-makhoaba ea naha.
“Kaha ho ile hoa tsejoa mushroom e le lijo ona o rekisoang mabenkeleng o tsoang ho bahlahisi e le lijo empa ke hlokomela hore motho ha a e bona feela naheng o itjoetsa hore o tšoasitse a sa ea tšolong. Ebe joale ba itjella eona.” Ke eena a hlalosa.
O phethetse ka hore hona joale lipula li ea na ‘me semela sena se hlaha ka bongata ‘me o ipiletsa ho bophatlalatsi ho tsoela-pele ho bua ka kotsi ena kaha e le bothata hajoale.
Matšoao a chefu ena ea koae-ea-makhoaba a ka fapana ho tloha ka mpeng ho isa lefung matsatsing a ka bang leshome ‘me matšoao a teng kamora ho e ja ke lehlatso, letšollo le mala a bohloko.
