‘KE TETEKILE MOSALI OA KA KA LITEBELE’ – QAMO MATELA
Ka Moipone Makhemeng
La 17 Tlhakubele 2023
Maobane nyeoe ea polao ea ‘Mahlompho Matela (Rethabile Mofolo) moo ho qosoang monna oa hae Qamo Matela, e tsoetse-pele e mametsoe ke moahloli Tšeliso Mokoko Lekhotleng le Phahameng, Maseru,
Paki e bileng kapele ho lekhotla e bile ea sepolesa; Inspector Moeketsi ea ileng a balla lekhotla polelo ea moqosuoa e ngotsoeng kaha ke eena ea neng a okametse lipatlisiso ka nako ea ho nka polelo ea moqosuoa pele ho nyeoe.
Moqosuoa polelong eo, o hlalosa hore o ne a le mothamahaneng bosiu ‘me a kopa ‘Mahlompho hore a ntše senotlolo sa hae monyako hoba eena o tla fihla bosiu a tsebe ho bula ka sa hae. O re ‘Mahlompho ha a ka a araba melaetsa ea hae ea WhatsApp. O re o bile a leka ho mo letsetsa empa mofumahali h’a ka araba ha e se ho koala mohala ha o lla kapa ho o toropa.
Polelong moqosuoa o hlalositse hore ha a fihla lapeng o ile a hlasela mohatsa ba le ka kamoreng ea bona ea boroko. O re o ile a mo teteka ka litebele kaha eo a sa ka a araba melaetsa ea hae ha a bua le eena ka WhatsApp ekasitana leha a mo letsetsa.
Polelong moo, moqosuoa o hlalositse ha a ile a kopa tšoarelo ho mofumahali oa hae ‘me a mo tšoarela. Leha ho le joalo, a bontša hore mohatsa o ile a ruruha marama; a khathatsoa ke lefu la ho akheha. Moqosuoa o hlalosa ba ile ba ea sepetlele Willie’s, Khubetsoana hoa hlahlobuoa lintho tsa bohlokoa e leng ho phalla hoa mali, tsoekere le tse ling empa tsohle li ne li lokile.
O tsoetse-pele ho hlalosa hore lefu la ho akheha le ile la ‘na la ipheta ‘me a mo isa sepetlele Maseru Private moo le teng litlhahlobo tse entsoeng sephetho sa ‘na sa tšoana. Ke moo ho iloeng hoa thoe ba etse tlhahlobo ea boko (CT Scan) ‘me ba ile ba lokela ho ea se etsa sepetlele Mapoteng empa khabareng hoa thoe a isoe naheng ea boahelani Bloemfontein.
