HOLOMO O KHUTLISETSA MODIA MOSEBETSING
Ka Leihlo la Basotho
La 25 ‘Mesa 2023
Mok’homishinara oa Sepolesa, Monghali Holomo Molibeli o qetelletse a phethahalitse e ‘ngoe ea likahlolo tsa makhotla leha a e-s’o li phethahatse kaofela kaha esale a laeloa ke Moahloli Ts’eliso Mokoko oa lekhotla le phahameng ho busetsa balebeli ba mohlahlami oa hae DCP Beleme Lebajoa bao esale a mo tsekisa bona hofihlela a qosetsoa ho nyelisa lekhotla ‘me taba ena e ntse e le makhotleng.
Ho ea ka lengolo le potolohang la Mokhatlo oa Mapolesa, Lesotho Police Staff Association (LEPOSA) monghali Molibeli o phethahalitse taelo ea lekhotla molemong oa moporesitente oa LEPOSA, Senior Inspector Teboho Modia ea ileng a mo behella ka thoko ho mosebetsi ngoahola.
Babali ba tla hopola hore kamora hore ho nyamele lithunya tse ngata motebong oa sepolesa Mafeteng le teko ea ho pshatla ntlo ea poloko ea lithunya Hlotse, LEPOSA e ne e lokolle polelo ho nyatsa le ho ts’oela ka mathe liketso tsa botlokotsebe tse etsoang ke sepolesa ho utsoa lithunya tse bolokiloeng ke sona.
Kamora polelo eo, mookameli oa sepolesa o ne a laele hore moporesitente oa LEPOSA Senior Inspector Modia a ts’oaroe ‘me a mo lahlela khotla ka qoso ea ho hlokisa sepolesa botsitso mosebetsing oa sona. O bile a mo behella ka thoko ho mosebetsi.
Lengolo la LEPOSA le baleha ka tsela ena: “Ke ka thabo e kholo mokhatlo o le tsebisang hore toka khabareng e phethiloe kaha mphato oa rona, e leng moporesitente oa mokhatlo o khutliselitsoe mosebetsing kajeno kamora ho behelloa ka thoko ke mookameli. Leru le lets’o leo esale le raba-raba hloohong ea hae le qhibilihile ‘me le ho sithabela maikutlong ho bakiloeng ke pehello ka thoko eo ho felile.
“Le tla hopola bo-mphato hore Mookameli o ile a behella moporositente ka thoko ho mosebetsi a sebelisa khaolo ea 53 (1) ea molao oa sepolesa khahlanong le moporositente ka la 28 Hlakola 2022.
“Moporesitente o ile a qosoa lekhotleng la ‘maseterata ho araba liqoso tsa bookameli. Leha ho le joalo, ka la 30 Pulungoana 2022 lekhotla la ‘maseterata le ile la mo fumana a se molato (oa ho hlokisa sepolesa botsitso). Empa leha a ile a fumanoa a se molato, mookameli h’a ka mo khutlisetsa mosebetsing hofihlela ka la 3 ‘Mesa 2023 ha liakhente tsa hae li ngolla mok’homishinara lengolo le mo kopang ho khutlisetsa Comrade Modia mosebetsing ‘me maqoetha a ile a fa mok’homishinara matsatsi a 14 hore a khutlistse ntate mosebetsing e seng joalo ba tla mo hulela khotla.
“Ke ka thabo ho le bolella hore ka la 21 ‘Mesa 2023, Cde Modia o fumane lengolo ho tsoa ho mookameli le mo tsebisang hore a khutlele mosebetsing hang-hang. Cde Modia o qetile likhoeli tse hlano a le ka thoko ho mosebetsi feela ho se mabaka a hlakileng hore ha a khutlisetsoe mosebetsing hobaneng.
“Re le botsamaisi ba LEPOSA re rata ho leboha bookameli ba sepolesa ho menahane ka ho ikobela liqeto tsa makhotla ‘me uena ntate Modia re u lakaletsa katleho le mahlohonolo ha e le mona o khutlela mosebetsing.” Le rialo lengolo la LEPOSA le ngotsoeng maobane.
