HO FUMANOA LITOPO TSE PELI KOALABATA
Ka Moipone Makhemeng
La 26 Tlhakubele 2023
E bile khapha-mali motseng oa Koalabata, Berea ha morena ‘Makhomo Makoanyane bosiu kapa mesong ea kajeno. Mehloli ea litaba e hlalosa hore ke litopo tsa bahlankana ba babeli tse phuthiloeng li le maqeba a ho nyekenngoa ka lintho tse bohale libakeng tse atamelaneng kahara motse.
Moqolotsi oa Leihlo la Basotho o kopile tlhaloso ho morena oa Koalabata, mofumahali ‘Makhomo Makoanyane ea tiisitseng hore ke ‘nete ho phuthiloe litopo tse peli hoseng kajeno motseng oa hae.
“Ehlile ho joalo ‘m’e, ho na le litopo tse peli mona tse fumanoeng li hlabiloe ka lithipa; se seng se ne se le ntlong ea mothamahane, se seng se ne se le pela tsela, se oetse ka forong kapa lerobalong.
“Ha re tsebe hore na mofu eo o ne a tsoa moo ntlong ea mothamahane kapa o na tsoa kae. Pelaelo ke hore o ne a tsoa mono mohlomong o hlotsoe ke leqeba. Bonnete ha re tsebe hore o hlabuoe hokae kapa o ne a tsoa Cleketseng ha re tsebe.
“Mofu e mong ke fumane tlaleho e hlakileng hore eena o hlabuoe ka thipa a le shopong e rekisang mothamahane empa liketsahalo tsena li etsahetse libakeng tse atamelaneng. Litaba tsena ke hona sepolesa se tlo etsa lipatlisiso ho fumana hantle se etsahetseng.” Mofumahali o li behile joalo.
