ECOCASH E KETEKA LILEMO TSE LESHOME
Ka Moipone Makhemeng
La 30 Phato 2023
K’hamphani ea mehala ea thekeng le lihlahisoa tsa marang-rang, Econet Telecom Lesotho (ETL) kajeno e ketekile lilemo tse fetang leshome e matlafatsa Basotho ka sehlahisoa sa Ecocash le Ecosure. Mokete o ne o ts’oaretsoe hoteleng ea Lancer’s Inn Maseru kajeno.
Mookameli oa Sasai Econet Financial Services mofumahali ‘Matikoe Letsie ketekong ena e tsotehang o fetiselitse liteboho tsa hae ho basebetsi-’moho, bareki esita le balekane ba bona ts’ebetsong. O ile a hlakisa hore sebaka sena seo ba se titimileng ke ka ts’ehetso le ts’ebelisano e hlollang le bohle ba bileng le seabo.
Letsie o hlalositse hore lilemo tse leshome tse fetileng morero oa bona e bile ho thusa sechaba ka likanta tsohle tsa Lesotho. O re pono ea bona ho tloha sethathong e ne e le ho matlafatsa batho ka bomong, malapa le likhoebo ka litharollo tse fihlellehang ebile li le ncha. O re kajeno ha a sheba tsela eo ba e kutlileng o motlotlo hore ba fetisitse litakatso tseo tsa bona.
“Ecocash ke sethala sa rona sa bopula-maliboho sa lichelete tse fetisoang ka mehala hape ke lets’oao la ho matlafatsa nts’etso-pele. Ha se feela hore Ecocash e fetotse mekhoa eo re sebetsanang le eona empa hape e fetohile sebetsa sa kholo ea moruo le botsitso.
“Ka Ecocash re matlafalitse likhoebo; ho li qala le ho li atolosa. Malapa a tseba ho romela le ho amohela lichelete. Re atlehile ho fihlella libaka le sechaba ho fumana lits’ebeletso tsa lichelete tse ka nqane ho matla a bona.” Letsie o thathamisa likatleho tsa bona joale.
’Maleseli Mohapinyane, mookameli oa Mukuru
Ho sa le joalo, o phatlalalitse ts’ebelisano-’moho ea bona le sehlahisoa sa Mukuru eo a itseng e tla akofisa phetiso ea chelete ho tloha machabeng e le ho kopanya malapa ho tloha ho ba phelang ka ntle ho naha ka sethala sa bona sa Ecocash. O supile hape hore ba holisa lits’ebeletso tsa bona ho sebetsana le litlhoko tsa letsatsi le letsatsi tsa sechaba. O boetse a re ba tlabotse selekane sa ts’ebelisano-‘moho le lebenkele la Pick n Pay ho tla nolofaletsa bareki ho reka habobebe lebenkeleng leo.
“Leeto la ho fihla mona le ts’oauoa ka boqapi, boinehelo le boitlamo ba ho mamela litlhoko tsa bareki ba rona. Re entse sena ho theha maqhama le ho matlafatsa ts’ebetso ea rona ekasitana le ho holisa lits’ebeletso tsa rona. Ha re ntse re eme holim’a bokamoso bo bocha re tlala cheseho e nchafalitsoeng kaha khaolo e latelang e ts’episa lintho tse ntle le ho feta.” Letsie o lihella likhala.
Mookameli oa Mukuru, ’Maleseli Mohapinyane ha a akhela oa hae molangoana o bonts’itse hore setsoalle sa bona se tlil’o tlisa phetoho e kholo maphelong a Basotho. O teka hore o motlotlo haholo hore kajeno setsoalle sa bona le Saisai Econet Financial Services se phethahetse kaha e se e le nako joale Basotho ba kopa hore Mukuru e hokahane le Ecocash.
O itse Basotho ba se ba atleha ho fumana chelete ho hlaha linaheng tse ‘maloa ka hare ho Ecocash tsa bona.
“Re lebohela ts’ebelisano-‘moho eo re bileng le eona le Ecocash. Basotho re le ts’episa hore re tla mamela likopo tsa lona hore setsoalle sena se bileng teng lipakeng tsa rona le Ecocash se tsoele-pele hantle. Tsamaiso ea chelete eo re le nehelang eona ehlile ke ‘nete ke tsamaiso e sireletsehileng, hape e potlakileng. Mosotho hohle moo a teng; e ka ba Botswana kapa United Kingdom hang ha a romela chelete ka hare ho spache-fono e kena hang-hang.” Mohapinyane o li beha joalo.
Monghali Pule ho hlaha Pick n Pay, o ile a lihella likhala ka ho bonts’a hore ba bile le leeto le letle le Ecocash ka spache-fono.
Monghali Pule ho hlaha Pick n Pay
Pule o li beha joana ; “Molemo oa bohlokoa feela ke hore rona re le Pick n Pay re ne re shebile boiketlo ba bareki ba rona. Ha ho na ntho e bohloko joalokaha moreki ha a tsoa ka lebenkeleng a re o shotile o ne a nkile chelete e lekaneng ebe o siea korosari moo ho lefelloang teng. Eaba Ecocash e’a fihla e etsa Agent moreki o ea teng o nts’a chelete oa tlatsetsa.
“Ecocash e ile fihla ea matlafatsa litaba tseno. Ke mona joale u se u sa hloke le hore u ka nts’a chelete hoba u so khona hore u ka patala ka fono feela. Ho rona, taba ena e etsa re ‘ne re ipabole ka mokhoa oo re fanang ka lits’ebeletso. Re leboha Econet haholo ka sehlahisoa sena sa bona.” O li kobella joalo.
