DR. PHOOKO O PHOMOLITSOE KA KHOTSO
Ka Moqolotsi oa rona
Letona la mehleng, Dr. Motloheloa William Phooko (83) e bile ngaka le ralipolotiki oa Lesotho, a ba a fihlela boemo ba ho ba letona la ‘muso. O hlahile ka la 12 Loetse 1939 a hlahela Qacha’s Nek ‘me a timela ka la 8 Motšeanong 2023. Kajeno ho bile le tšebeletso ea lepato la hae, Lithabaneng, Maseru moo a neng a ahile teng.
Dr. Pakalitha Mosisili lebitsong la lelapa
Ha a hlalosa se jeleng mofu, mora oa hae, Phooko Phooko e le mooki o bontšitse hore ka selemo sa 2021 mofu o ile a fumanoa a na le mofetše oa senya moo a ileng a tsamaea kalafo Bloemfontein hofihlela lingaka li mo bolella hore lefu le taolong.
Mooki o bontšitse hore ngoahola molekane oa Dr. Phooko o ile a hlokahala eaba o boela a kula hape kamora lefu la mohatsa oa hae. Mooki o bontšitse hore khoeling ea bobeli monongoaha, pelo le liphieo tsa Dr. Phooko li ne li se li sa sebetse hantle hofihlela ntoa e ba hlola ka la 8 Motšeanong 2023.
Morali oa mofu, Puleng Phooko o re ntat’ae o ne a tseba mosebetsi oa matsoho a ikahela masaka a liphoofolo tsa hae
Morali oa mofu, Puleng Phooko o ile a bala pale ea mofu. A re mofu o sebelitse nako e telele e le ngaka; a ba a bula setsi sa hae sa kalafo (surgery). Ha a bua ka bosebeletsi ba hae ‘musong, o itse ka 2007 Dr. Phooko o ile a sebetsa e le setho sa Ntlo ea Mahosana hofihlela 2012. O bile a fuoa mosebetsi oa botona ofising ea tona-kholo hona ka 2007.
Morena oa Sehlooho oa Thaba Bosiu, Khoabane Theko
Mona Dr. Phooko o ile a ba le seabo meralong ea khaho ea Sepetlele sa Sehopotso sa Mofumahali ‘Mamohato. O boetse a sebetsa ka matla theohong ea Linkokwing University koano Lesotho ekasitana le ho sebetsa hore moaho oa Lekala la Bophelo o be teng.
Ka 2012, Dr. Phooko o bile a fuoa mosebetsi e le Letona la Bosebeletsi ba Sechaba. Lelapa le re o ne a a boetse a iphilisa ka temo a lema masimong ekasitana le ho rua liphoofolo.
Motsamaisi oa Ntlo ea Bakhethoa, Tlohang Sekhamane, o re le eena o kile a alafshoa ke Dr. Phooko
Lebitsong la lelapa, Dr. Pakalitha Mosisili o ile a leboha ‘muso ka ho fa ngoana bona lepato la semmuso. “Lelapa le itse ke lebohe ka ho khetholoha tabeng ena ea lepato la semmuso. Lelapa le ntaela ho leboha bohle ba atlehisitseng lepato lena ekasitana le sechaba se ileng sa putukana mane lapeng kamora hore mokhosi o hlahe.” Mosisili o behile liteboho tsa hae joalo.
Morena oa Sehlooho Thaba-Bosiu, Khoabane Theko o ile a paka mofu a re maputulo a hae a bonahala. “Bafokeng rea le tšelisa hobane le rona re lahlehetsoe ke koakoariri naheng ena.”
Tona-Kholo, Sam Matekane
Motsamaisi oa Ntlo ea Bakhethoa, Tlohang Sekhamane o ile a tšelisa lelapa, a re o tsebile mofu hantle kaha o kile a mo thusa nakong eo a ntseng a sebetsa e le ngaka. O boetse a o phafa bosebeletsing bo botle: “Nke ke ka lebala ha ntate Phooko a loantša lefu la HIV/AIDS ka matla. “Lona bana ba mofu ha le ea lokela ho lla le itšele ka meokho. Ho pata motsoali oa lona a fetile lilemo tse 80, le lokela ho leboha.” Sekhamane o fera matšeliso.
Tona-kholo Sam Matekane o ile a fuoa sefolo ‘me a supa hore eena h’a na mantsoe kaha Motlotlehi ke eena ea tla beha litaba tse felletseng tsa ‘muso.
Motlotlehi Letsie III
Motlotlehi o ile a bua le bana ba mofu: “Uena Phooko le Puleng, ke rata hore le ‘na ke tšoane le ntate Sekhamane ha a re le lona leha lipelo tsa lona li le bohloko empa ona motsotso, e-be nako ea ho leboha.”
Motlotlehi o ile a laea bana ba mofu hore kajeno ba holile ka lebaka la motsoali oa bona, a re kaholimo ho tsohle ba lule ba leboha Molimo ea ba hlomphileng, ea ba ratileng. O ile a fera puo ea hae ka ho tšelisa lelapa le sechaba ka ho feta hoa Dr. Phooko. A re o leboha bosebeletsi bo makhethe ba hae.
Lerotholi Pheko, mongoli oa ‘muso ea neng a tsamaisa ts’ebeletso ea lepato
