BOBOLU BO NYONTŠANG LIHOAI SADP
Ka motlalehi oa rona
La 29 ‘Mesa 2023
Leha bafani ba ikemiselitse ho thesemetsa limilone tsa litolora tsa liphallelo ho thusa lihoai tsa Lesotho ho ntlafatsa temo e le ho e beha maemong a khoebo, mookameli oa setsi sa ntlafatso ea temo, se laoloang ke Lekala la Temo, Smallholder Agriculture Development Project (SADP) ‘Malichaba Nkhethoa o tlalehoa a lalasa le ho etsa borata ho honya chelete ea bafani molemong oa ho ithuisa le metsoalle ea hae.
Nkhethoa o qalile ho sebetsa e le mookameli oa SADP ka Tšitoe 2021 ha pele a ne a okametse lefapha le fanang ka liphallello ho lihoai hona SADP.
Ho ea ka koranta ea Lesotho ea marangrang, MNN Centre for Investigative Journalism (MNM) mehopolo ea lihoai tse ntseng li hola e lerootho kaha Nkhethoa o li soetsa hore temo e se ba tsoalle namane e tšehali ka ho honya chelete ho e khelosetsa lipokothong tsa hae.
Ho ea ka tlaleho ena, lihoai tse batlang ho thusoa ka liphallelo li etsa likopo ho SADP ‘me lihoai li ba monyetleng ho ho abeloa M40 000 ho isa M200 000 e le phallelo ea ho holisa temo ea khoebo. Ha kopo ea sehoai e amohetsoe SADP ke eona e rekelang sehoai thepa.
Mona ke hona moo Nkhethoa a tlalehoang a qobella lihoai hore li reke thepa ea temo ka ho khetha lik’hamphani tsa metsoalle ea hae feela, hore e-be tsona tse fanang ka litšebeletso ‘me o ithuisa ka ho menahanya litheko e le hore a itjelle chelete.
Nkhethoa ka linako tse ling o tlalehoa a etsa bobolu ba hore litefello li etsoe habeli molemong oa hore eena le metsoalle ea hae ba ikhapele lichelete tsena kaha a sebelisa tsona lik’hamphani tsa metsoalle ea hae.
MNN e sibollotse hore lihoai tse lekileng ho nyatsa bobolu bona li tingoa menyetla ea ho fuoa liphallelo tsena.
Liofisiri tse lokelang ho sebetsa le Nkhethoa tabeng ea ho khetha lik’hamphani tse fuoang mosebetsi oa ho fana ka thepa ea temo joaloka matanta a moriti, lipeipi tsa noesetso, li haneloa ho etsa tšebetso ena ‘me Nkhethoa o li etsa a le mong.
Har’a metsoalle eo lik’hamphani tsa eona li sebelisoang ke Nkhethoa, ho homolla chelete ea bafani ho hlahella Motšelisi Letokoto le Amanda Matoro Likhoa ‘me bobeli ke bathehi ba k’hamphani e bitsoang M&L Holdings ‘me eona esale e sebetsa le SADP ho e rekisetsa matanta a moriti le litšebeletso tsa ho fata metsi a fatše.
M&L Holdings e boetse e sebetsa le lik’hamphani tse ling e leng KB Express le Agrotech ‘me tsona ke tsa Amanda Matoro Likhoa le monn’ae Likhoa Likhoa. Ho feta mona Motšelisi Letokoto o boetse o na le lik’hamphani tse ling hape; Shezy Consultancy le Lihlaba Bliss ‘me le tsona li fana ka litšebeletso tsa matanta le ho fata metsi fatše ‘me le tsona esale li fuoa mosebetsi ke SADP.
Letokoto ha MNN e mo batla maikutlo ka litaba tsena o itse ehlile lik’hamphani tseo ke tsa hae empa a re ha a bone phoso ha li lula li fuoa mosebetsi ke SADP. Nkhethoa o hanne ho hlahisa maikutlo litabeng tsena ha MNN e mo atamela.
Ho sa le joalo, ea tšoereng mokobobo e le Mongoli e Moholo lekaleng la temo, Masia Johane o itse ba lekile ho khalema Nkhethoa ka litaba tsena ‘me o re eena le letona la temo, Thabo Mofosi ba mathuleng a ho mo nkela likhato tsa molao.
Litaba tsena li hlaha mona: https://lescij.org/2023/04/28/rot-dashes-smallholder-farmers-hopes/
