BASOTHO BA KHETHILE KA MONYEBE
Ka Moipone Makhemeng
La 30 Loetse 2023
Maobane e bile letsatsi le leholo naheng ea Lesotho kaha Basotho ba ne ba kene likhethong tsa Makhotla a Puso ea Libaka e le ho khetha mak’hanselara naha ka bophara. Likhetho tsena li tšoaroa kamora lilemo tse hlano.
Mokhethi o lahlela pampiri ea likhetho ka lebokoseng
Moifo oa Leihlo la Basotho o ile oa potoloha litsing tse fapaneng tsa khethiso. Har’a litsi tseo re li etetseng mabatoeng a Mokhethoaneng, Mabote le Thuathe re bone bakhethi ba ea ka monyebe o moholo litsing, kaha batho ba ne ba fihla e le methoaela.
Leha ho le joalo, ho na le litsi tse ling tseo ho bonahetseng lipalo tse khothatsang tsa bakhethi joaloka setsing sa The Lord’s New Church Primary School (Ha Foso), Lancer’s Gap Primary School le Thuathe Primary School.
Balebelli ba likhetho setsing sa Koalabata Primary School
Mookameli oa setsi sa Komisi se neng se hlonngoe The Lord’s New Church mofumahali ‘Matanki Khoeli puisanong le Leihlo la Basotho o bontšitse a khotsofetse ke lipalo tse bileng teng. Ha a beha a mabeli o itse; “Mona ke khubung ea Ha Foso, ke ka hona u bonang bongata ba batho bo tlile. Ntho e ‘ngoe hape ke hore ho bonahala molaetsa o ile oa fihla sechabeng ka tsela e khotsofatsang hore batho ba tle ba tlo khetha.”
Mokoloko oa bakhethi setsing sa The Lord’s New Church, Ha Foso.
Ka lehlakoreng le leng, monghali Malefetsane Seleke setsing sa Koalabata Primary School, o bontšitse batho ba tla ka monyebe ‘me a supa hore mohlomong lebaka la seo ke hore sechaba se koatile kapa molaetsa o sa feta ka nepo mabapi le likhetho empa ha a na bonnete ba se bakang monyebe.
Haele maemo a tšireletso litsing tsohle tse etetsoeng a bonahetse a le matle ‘me tsohle li tsamaea ka thello. Ho feta mona, boholo ba litsi baokameli ba khethiso ba bontšitse qholotso eo ba tobaneng le eona e le ea batho ba tlang ba lebetse boitsebiso ha ba bang ba ne ba sa hlahe mananeng a bakhethi.
Bakhethi setsing sa The Lord’s New Church, Ha Foso
Monghali Sekautu Monoto setsing sa Lebohang AFM Primary School o itse ho bile le mokhethi ea khutlileng a sa atleha ho khetha kaha mabitso a hae a ne a hlaha le hoja matsatsi a tlhaho a ne a fapane le a boitsebisong.
Haele setsing sa The Lords New Church Primary le hoja mookameli a ne a bontšitse ho se liqholotso tsa mofuta o joalo, ke bakhethi ba babeli ba khutlileng lipelo li rotha mali ka lebaka la ho se hlahe hoa mabitso a bona lenaneng la bakhethi, ‘me ba ile ba sitoa ho khetha.
Bakhethi setsing sa The Lord’s New Church, Ha Foso…
Ba buisana le Leihlo la Basotho ba bontšitse sena se lula se ba etsahalla; ba re le nako e fetileng ba khutlile ka tsela e tšoanang leha ba ile ba nchafatsa mabitso a bona. Hofeta mona, setsing sa Thuathe Primary School taba e tšoanang moifo oa koranta o e bone etsahala.
Ho phethela, Koranta e ile ea buisana le e mong oa bakhethi, Sister Anna Lekhoba a le setsing sa Koalabata Primary School: “Ke fumane batho ba fahleho li ntle, ba ileng ba ntataisa methating eohle ea ho khetha. Leha ke se ke le lebokoseng ke ile ka ba bitsa ba nthusa ba ntse ba thabile.” Sister Lekhoba o li beha joalo.
Balebelli ba likhetho setsing sa Sekamaneng Primary School
