BASEBETSI BA QUEEN ’MAMOHATO BA MATHELA KHOTLA
Ka Moipone Makhemeng
La 4 Phupu 2023
Basebetsi ba 27 ba sepetlele sa Sehopotso sa Mofumahali ‘Mamohato (Queen ‘Mamohato Memorial Hospital – QMMH) hammoho le litliliniki tse ikarabellang sepetleleng seo ba hlahletse nyeoe khahlanong le mohiri oa bona QMMH Lekhotleng la Bosebetsi, Maseru.
Balli ba sebetsa mesebetsi e fapaneng litsing tsa bophelo; ba bang ke baoki, bahlabolli, batsoaki ba litlhare, ba amohelang baeti (receptionists), ba sebetsang tsamaisong, serapeng, joalo-joalo. Nyeoe e qalile ho mameloa ka Laboraro la 28 Phuptjane 2023.
Balli ke ‘Maphantši Mohlomi, Nthabeleng Mafereka, ‘Machapi Chapi, Nobayene Velaphe, Lehlohonolo Phiri le ba bang ba 22. Athe baikarabelli ke Queen ‘Mamohato Memorial Hospital, Lekala la Bophelo le Ramolao e Moholo oa ‘Muso. Mokhatlo oa basebetsi, Lesotho Workers’ Association (LEWA) o buella balli kaofela.
Ho ea ka lithapeli tsa balli, ba batla hore lekhotla le ba namolele khethollong eo ba reng Sepetlele le Lekala la Bophelo li ba etsetsa eona. Ba re khethollo e bonahetse ha bahiri ba phahamisa le ho nyolla meputso ea basebetsi ba bang empa bona ba siuoa ka thoko hammoho le bahlanka ba bang ba sepetlele le litliliniki.
Balli ba batla ho bona tekano ho basebetsi bohle e le banna kapa basali. Ba kopa hore lekhotla le ba makalise hore na sepetlele se sebelitse joang ha se nyolla meputso ea basebetsi ba bang se siea ba bang ba sebetsang mosebetsi o tšoanang ebile ba le maemong a tšoanang.
Ho feta monna, baqosi ba lla ka hore mohiri o lumella balebeli ba banna ba sebetsang litsing tsa bophelo, ba k’hamphani ea G4s, ho secha basali bao e leng basebetsi litsing tse boletsoeng tsa bophelo. Sello ke hore taba ena ha e na toka kaha e thulana le melao ea bosebetsi. Mona ba batla hore basali bohle ba ileng ba hobosoa ka ho phopholetsoa ke banna ba tšireletso ba fuoe matšeliso a sa feteng M5000 motho ka mong.
Ba boetse ba batla hore lekhotla le laela moikarabelli oa pele le oa bobeli ho sebelisa mokhoa oa ho phahamisa meputso ea basebetsi ho ea ka moo ho neng ho sebetsoa ha sepetlele se ikarebella ho Tšepong PTY Ltd. Poboli e ’ngoe ke hore khiro e ncha ea balli (kamora hore Tšepong e tsamaee) ha e ea kenyeletsa meropotso ea provident fund, ’me ba lumela hore sena se ka thoko ho molao ho ea ka motheo oa tumellano ea ho theha sepetlele (Public–Private Partnership – PPP). Khang ea bona ke hore ho tlosoa hoa provident fund ho hohlana le litemana tsa 47.4.4 le 47.4.3 tsa tumellano ea PPP.
Ho sa le joalo, Thapeli ea ho qetela ke hore balli ba batla lekhotla le laele baikarabelli ho laela bahlanka bao e leng banna ba k’hamphani ea tšireletso (G4s) ho khaotsa ho hlahloba basebetsi bao e leng basali hang-hgang
