BASALI BA MASOLE BA MATHELA HO MONAMOLI
Ka Moipone Makhemeng
La 31 Phato 2023
A mang a mafumahali a masole a Lesotho a lebotho la pele a ileng a romeloa ntoeng Mozambique ka 2021 eaba a khutlela hae kamora ho phomotsoa ke bo-mphato oa ‘ona, ba na le seboko sa phohomela ka litaba tsa banna ba bona. Balekane ba masole ba mathetse ho Monamoli oa Sechaba, Adv. Tlotliso Polaki hore a ba namolele.
‘Muso oa Lesotho o ile oa nehelana ka litsiane ho masole ao e le teboho le kananelo ea boitelo ba ‘ona ho loantšana le marabele a itšemmeng bora profinsing e nonneng ka lirafshoa ea Cabo Delgado, Mozambique. Lesole ka leng le ile la kiba-kiba ka M100,000.00.
Ho sa le joalo, basali ba bang ba masole ana ha ba khotsofala; ba re banna ba bona ba lokela ho fumana litsiane tse ling ho hlaha ho SADC. Ba lla ka hore molaoli oa sesole sa Lesotho esale a ba tšepisa hore balekane ba bona ba tla fumantšoa chelete eo empa ba bona meso e ntse e tsoala mesoana.
Lekhatheng lena, ba ngolletse Monamoli, Adv. Tlotliso Polaki ba re a kene lipakeng ho fihlela tharollo. Mosebetsi oa Monamolli ke ho rarolla litletlebo tsa sechaba ka bosebeletsi ba makala a ‘muso hammoho le likoporasi tsa ‘muso. Ho ithuta haholoanyana ka mosebetsi oa Monamoli babali ba ka penya 👉🏼mona.
Monamoli, Adv. Tlotliso Polaki,
Lengolo la bona le ngotsoeng ka la 29 Phupu 2023 le baleha ka tsela ena.
Sehlooho sa lengolo se re: SADC TROOP ALLOWANCE
“Re le mafumahli a masole a Lesotho a ileng a romeloa ntoeng Mozambique ke SADC ka Phato 2021, re tla ho uena hobane banna ba rona ha ba e-s’o fumantšoe litsiane tsa masole tse fanoang ke SADC.
“Re kopa thuso ea hau ho rarolla qaka ena. Re ile ra tšepisoa ka la 12 Pherekhong 2022 kopanong ea rona le Molaoli oa Sesole, Lieutenant General Mojalefa Letsoela re le Makoanyane Barracks.
“O ile a re tšepisa hore chelete e joalo e tla lefshoa ho masole hang h’a fihla ho tsoa Mozambique. Kamora moo, re boetse ra ngolla molaoli mangolo a mang a mabeli ho kopa tlhakisetso ka tiehiso ea tefo ea chelete empa ha re e-s’o arajoe. Kamora ho fana ka lengolo la pele ba bang ba balekane ba masole ba bararo ba ile ba bitsoa ke bolaoli ba il’o botsoa ka lengolo leo.
“Re boetse ra ngolla ofisi ea tona-kholo ka taba e tšoanang hore e kene lipakeng empa le teng re tehile kalala. Mona lengolong la rona re qhoaella mangolo ao e le bopaki.” Ke lengolo la basali ba masole leo.
Ho sa le joalo, Leihlo la Basotho le batlile lehlakore la litaba tsena ho mookameli oa liphatlalatso Lesotho Defence Force, Lieutenant Colonel Sakeng Lekola, ea ileng a re ho moqolotsi: “LDF ha e boemong ba ho arabela litaba tsena, a k’u botse Lekala la Tšireletso. Masole a ileng ntoeng tlas’a taolo ea SADC a ile moo a isitsoe ke ‘muso. Ke bolela hore masole ao h’a isoa moo ke molaoli oa sesole. Ke lakatsa ho hlakisa hore litaba tsohle tsa boiketlo ba bona li matsohong a ‘muso, e leng hore litaba tsena li ka arajoa ke batho ba entseng deploy batho bano.” Lekola oa hlalosa.
Lieutenant Colonel Sakeng Lekola, Mookameli oa Liphatlalatso LDF
Moqolotsi: “Ke lakatsa ho utloisisa hore na ka tsebo ea hau masole ao ha a ile ntoeng na ho na le chelete eo SADC e fanang ka eona ho masole e le meropotso kapa che?”
Lekola: “Ha ke batle ho sebelisa tsebo ea ka tabeng eo rona re sa ameheng ho eona. Ha u ka mpotsa ka masole a ileng Mokhotlong kapa Thaba-Tseka nka e araba hobane ke ea tseba kaha ‘ona a entsoe deploy ke LDF. Ho bohlokoa hore u botse ba ‘muso e leng ba baholo ba rometseng masole ao Mozambique.” Lit. Colonel Lekola o fera litaba tsa hae joalo.
Moqolotsi o boetse a ikopanya le Mongoli e Moholo oa Lekala la Tšireletso, Maphunye ‘Mamonyane Bohloko. Eena o itse: “Mafumahali a itse ha a khotsofala? Ba joetsitse uena hore ha ba khotsofala? ‘Na ha ke e-s’o fumane tletlebo e joalo le molaoli oa sesole ha e-s’o fumane tletlebo e joalo.
Maphunye ‘Mamonyane Bohloko
“Taba ea bobeli ke hore ha ba re ba lokela ho fumana chelete ho SADC, taba eo ba e nka kae? Ha ba tlise litokomane e le bopaki.” Ho rialo mofumahali Bohloko.
Moqolotsi o ile a etsa potso hore na ke taba e teng hore masole a Lesotho ha a ile ntoeng a ronngoe ke SADC na a ee a fuoe chelete ke SADC. PS e ile ea mo fetola ka tsela ena: “Ke tekenne boitlamo ba lekunutu, ha ke tlo buisana le baqolotsi ka meputso ea batho. Le ‘ona masole a tseba hore a nkile kano. Ke kopa hore ka boikokobetso u ntumelle ke koale fono ena hobane ha ke tlo bua litaba tseno. I am a PS ke saenne oath.
“Taba ena e ama maphelo a batho, re lahlehetsoe, re kahar’a ntoa joale ebe re tlo bua ka ntho tse kang tsee? Ba joetse ba tle koano ofising ea ka, bye bye.” PS e koala fono ha e cho joalo.
Phala ea ofisi ea Monamoli, mofumahali ‘Mathabiso Phelane maobane puisanong le Leihlo la Basotho o itse tletlebo ea balekane ba masole ha e-s’o fihle tafoleng ea Monamoli.
