MEELI EA LI-4+1 E’A ATOLOSOA
Ka Moipone Makhemeng
La 16 Pherekhong 2024
Lekala la Mesebetsi e Meholo ea Sechaba le Lipalangoang le phatlalalitse hore makoloi a manyane a baeti (4+1) a ekelelitsoe setsiketsi sa ho tsamaisa baeti ho tloha ho lik’hilomithara tse leshome (10km radius) ho ea ho tse leshome le metso e mahlano (15 km radius).
A bua ‘mokeng oa baqolotsi Ha Foso, Berea maobane, Mok’homishinara oa Lipalangoang, ‘Mathabo Ts’osane o hlalositse Lekala la habo le tlisa phetoho ena ka lebaka la liqholotso tse bakiloeng ke kholo ea litoropo.
‘Mathabo Ts’osane
“Re hlokometse qholotso ea hore setsiketsi seo re ileng ra fana ka sona sa 10KM sea fokola. Re boetse ra hlokomela re le lekala hape hore re lahleheloa ke boikarabello ba ho fa bapalami mofuta oa lipalangoang o tla etsa hore ba ikutloe ba phutholohile ebile ba sireletsehile, ba tsebe ho phetha mabaka a bona ka nako e hlokoang ke bona e le bapalami.” Ts’osane o li ts’etleha joalo.
E le ho fumana tharollo qholotsong ena, lekala le fumane hore molao o tsamaisang ts’eho ea meeli o bulehile ho sarolla kapa ho notla meeli. A re molao o joalo o re ke boikarabello ba Boto ea Lipalangoang (Road Transport Board) ho eketsa kapa ho fokotsa meeli ho latela maemo a renang ka nako eo.
“Kajeno re etsa phatlalatso hore Lekala la Mesebetsi e Moholo le Lipalangoang ho tsebisa sechaba hore likoloi tsa li-4+1 ha li sa tla tsamaea setsiketsi sa 10km. Qeto ke hore li tla tsamaea kahar’a 15km e leng kahara meeli ea ‘masepala kahara teropo ho ea ka Molao oa Puso ea Libaka oa 2010.” Ts’osane o rialo.
Maama Letsie ea sebetsang e le mookameli oa lits’ebeletso lekaleng leo (Operations Manager), o itse ha ba sa tla its’oenya ka ho sheba lik’hilomithara kaha ba tla sheba feela meeli ea toropo. A teha mohlala ka hore libakeng tse ling kahara teropo ho na le mabenkele a maholo joaloka Masianokeng. A re moo li-4+1 li ne li sa lokele ho tsamaea ho ea ka moeli oa pele oa 10km.
Ho sa le joalo, bo-ralitekesi ba Maseru ba tekile sello hore ba hanana le qeto ea ‘muso ea katoloso ea meeli.
Puisanong le Leihlo la Basotho, bakhanni le lipeketere tsa litekesi ba sola ts’usumetso e mpe ea li-4+1 mosebetsing oa bona ho theosa le lilemo. Ka ho otloloha, monghali Rabotala Mathetsa e le sepeketere sa litekesi tsa Maseru ho ea Mohale’s Hoek o itse esale li-4+1 li kena ts’ebetsong, khoebo ea bona e thefulehile kaha li tsamaea ho feta lik’hilomithara tse leshome ebile li neheletsana ka baeti joalo ho fihla pele.
Monghali Rabotala Mathetsa
“Ho tloha mona 4+1 e tla nka e fihle e u lahle Masianokeng, e ‘ngoe e u lahle Ha Motloheloa, e ‘ngoe e fihle e u lahle Roma, e ‘ngoe Ha Moits’upeli e ‘ngoe Nyakosoba. Na koloi ea Moits’opeli ea 15 seaters e tla fihla e na le baeti?” Mathetsa o rialo.
Ho sa le joalo, e mong oa baqhobi monghali Lekunutu Leqhebo o totobalitse qeto ena ea ‘muso e le e bolaeang likhoebo tsa litekesi hore ba se phele.
monghali Lekunutu Leqhebo
O lla ka hore boholo ba tsona ke tsa bahlanka ba ‘muso. O boetse a nyatsa taba eo ka hore ho ea fosahala hore ebe bahlanka ba kene ka hare ho khoebo e joalo ea batho ba sa sebetseng.
“Batho bana ba nang le li 4+1 ke mapolesa, ke masole, ke matichere batho ba kholang ha khoeli e fela. E le hore ke phoso hore ebe re ntse re hoeba le batho ba sebetsang. Esale ke fihla ka hora ea bosupa ha ho e-s’o be le motho ea palamang, re ntse re lutse.” Leqhebo o tletlebo joalo.
