NGAKA E OTLOLLA LEBOLLO LA KABI
Ka moqolotsi oa rona
La 15 Pherekhong 2024
Molula-Setulo oa Komiti e Kholo ea Naha ea Lebollo, Ngaka Maema Mokatsanyane o re ke leshano le mpipi litaba tse ntseng li buuoa ka lebollo la Mohlomphehi Nkaku Kabi – moeta-pele oa Kobotata ea Basotho (All Basotho Convention – ABC).
Mokatsanyane o bua tjena khahlanong le litaba tse ileng tsa hlahella maselinyaneng a lehae tse bontšitseng ha Kabi a bollotse matsatsi a mararo feela (72 hours) Matatiele, Eastern Cape, Afrika Boroa.
Lekoloane Nkaku Kabi (middle le Ngaka Maema Mokatsanyane (right)
Mongoli oa Komiti e Kholo ea Lebollo, Mopheme Mokoena o hlahelletse koranteng ea The Post a lla ka hore babolli ba Lesotho ha ba amohele lebollo la Kabi kaha a itse o bollotse feela matsatsi a mararo. Mokoena o itse bonyane motho o lokela ho bolotsoa libeke tse hlano.
“Komiti ea heso e tla lula ka Laboraro bekeng e tlang ho tla tšohla boitšoaro bo sa amoheleheng ba Kabi.
“Haeba a ka bonoa litabeng tsa lebollo koano Lesotho, o lokela a bolotsoe bocha.” Ke Mokoena koranteng ea The Post a bile a thatiselletsa ka hore Kabi haeba a sa bolotsoe hape o tlameha ho fella moo a bolotseng teng ka lebollo – Afrika Boroa.
Ho sa le joalo, koranta ea Leihlo la Basotho e atlehile ho fumana lehlakore la Monghali Maema Mokatsanyane e leng ngaka e bololitseng bashemane moo Kabi a titimetseng teng, Afrika Boroa. Mokatsanyane o boetse hape ke Molula-Setulo oa Komiti e Kholo ea Lebollo naheng ea Lesotho.
O latotse bosehla taba ea hore Kabi o bolotse matsatsi a mararo.
“Ke leshano hore ntate Kabi o bolotse matsatsi a mararo. ‘Nete ke hore Ntate Kabi o bolotse libeke tse tharo.
“Maemong a khethehileng, ha motho a na le mabaka, ho’a lumelloa hore a ka bolla bonyane libeke tse tharo. Batho ba Afrika Boroa, ba tseba moetlo, ba ne ba ke ke ba ntumella ho bolotsa motho matsatsi a mararo, ke re lekhale!”
Lekoloane Nkaku Kabi (right) le Ngaka Maema Mokatsanyane
Mokatsanyane o re hang hoba a bone mashano likoranteng o ile a botsa mongoli oa hae ea ileng a itatola.
“Motho enoa Mopheme ke mongoli oa ka. O re koranta eno e mo tolokile hampe. Esale a re o tla khutlela ho ‘na feela ke bona eka o sa tšaba. O re o ne a sa tsebe hore Kabi o bololitsoe ke ‘na feela ke ne ke mo joetse litaba tseno.
“Feela ha u mo sheba, (Kabi) u bona eka ke motho ea sa kenang bathong? Ha se patuoe mo shebe ke eno lifotong.
Motho enoa o buile lintho lisele feela ka litaba tsa ntate Kabi. Ke re ntate Kabi o bololitsoe ke ‘na, motho ea nang le bothata a tle ho ‘na koano.” Oa hlalosa.
Mokatsanyane o supile hore ha Kabi a kena mophatong, ba ile ba sebetsa ‘moho hore taba eo e-be pinyane.
“Ha ke ne ke mo nka taba eno ke ne ke e entse pinyane ka ho etsa leqheka la hore mofumahali oa hae a sebelise fono ea hae, kaha e ne e setse hae; ke ile ka re a ‘ne a ngole le ho marang-rang, a ngole joalokaha eka ntate o ntse a le hae. Re ba lahlisitse mohlala!
“Hantle batho baa ba batlang? Ba ne ba batla ho etsa Kabi eng?” Mokatsanyane o menyeletsa maritsa joalo.
