‘MUSO O HLOILE BASOTHO – LESOTHO EFF
Ka moqolotsi oa rona
La 5 Pherekhong 2024
Mokha oa lipolotiki oa Lesotho Economic Freedom Fighters (LEFF kapa Lesotho EFF) o lokollotse polelo khahlanong le ho tšoaroa hoa makholo-kholo a makoloi a baeti (4+1) ke sepolesa. Lesotho EFF e re ketso eo e emere lehloeo le lehlofu la ‘muso ho Basotho ba kojoana li mahetleng.
Ho sa le joalo, makoloi a tšoeroe ke sepolesa ka bongata kamora ho fumanoa a sebetsa ka thoko ho molao. LEFF e ipilelitse hore sepolesa se lokolle makoloi ao a Basotho hang-hang.
Tefo Makhakhe, moetapele oa Lesotho EFF – Image: What’s In The Kingdom
Mokha ona o re beng ba makoloi ao ke Basotho ba lekang ho beha bohobe tafoleng empa ba maketse ho bona ‘muso hammoho le litsi tsa tšireletso o fina selelu ha o lebane le bahoebi ba banyenyane feela melata le barui ba itsoella-pele ka khoebo ba sa khathatsoe ka letho.
“Molao o shebahala o na le mahlo ha o lebile Basotho ba ba kollang ntsi hanong empa melata le barui ba itjella monakalali-oa-keboleloa khoebong.” Polelo e rialo.
LEFF e re melata e mengata e kene mefuteng ea likhoebo e tšoaetsoeng Basotho feela empa ‘muso o thotse tuu! Mokha oa LEFF o qotsa schedule 16 ea molao oa Business Licensing and Registration Regulation (2020) o totobatsang hore mefuta ea likhoebo e 47 e tšoaetsoe Basotho feela. Ka tlaase ke e meng ea mesebetsi e tšoaetsoeng Basotho feela:
“Honajoale re linakong tse boima moo Basotho ba lekang matsapa a bophelo moo oona ‘muso o hloloang ho batalatsa mabala hore Basotho ba thuthuhe khoebong. Basotho ba sitisoa ho kena khoebong ke lipehelo tse boima tseo e leng likhoqetsane tse hlahang phanong e mpe ea litšebeletso mafapheng a ‘muso.”
Ho feta mona, Lesotho EFF e re mapolesa a lula a lelekisa baitšokoli nako eohle moo ba rekisetsang seterateng. “Mapolesa a manakisa baitšokoli a bile a rohaka baqhobi ba litekesi feela melata eona e hoeba ka bolokolohi bohle likhoebong tse ka thoko ho molao.
Makoloi a Basotho a ts’oeroeng [Image from Facebook]
Polelo e meketsa e re bopaki bo bongata bo ‘supang lehloeo la ‘muso ho Basotho.’ “Honajoale mapolesa a tšoere likoloi tse ngata tsa bahoebi ba litekesi ‘me ba hlotsoe ho sebeletsa malapa a bona.”
Polelo e phethela ka hore ha se toka ho sekisetsa Basotho menyetleng ea khoebo empa melata e bokotsoa.
“Molao o lokela ho sebetsa ho bohle; o se ke oa sebetsa ho mafutsana feela. Oona molao o sitoang ho sebelisoa ho ipapisitsoe le Schedule 16 ea Business Licensing and Registration Regulations 2020 o lokela ho tšoana ho bahoebi ba litekesi. Molemong oa toka, Lesotho EFF e ipiletsa hore makoloi ‘ohle a tšoeroeng a Basotho a lokolloe.” E fella moo polelo.
