KHOABANE O MANOLLA QABANG EA HAE LE SEBONOMOEA
Ka Moipone Makhemeng
La 18 Tšitoe 2023
Morena oa Sehlooho oa Thaba-Bosiu, Mohlomphehi Khoabane Theko o manollotse ka botlalo se bakileng qoaketsano lipakeng tsa hae le Mohlophisi e Moholo oa Moafrika FM, monghali Sebonomoea Ratabane Ramainoane. Khohlano lipakeng tsa bona e bonahetse fitieong e ileng ea likoloha ho marang-rang.
Khatisong eo, Morena oa Thaba o hlahella a batla ho ineha Ramainoane nakong eo a ntseng a hatisa fitieo. “A k’u buoeng le poli ena hle, se ka ‘na nkuka lifoto.” Leo ke lentsoe la Morena Theko a tseka hore Ramainoane a se mo nke fitieo.
“Thiba motho eno, ehlile ke ea u nka. Mona ke ha ka, ke tla nka litšoantšo feela.” Ramainoane oa araba a itsoella-pele ka khatiso. Ho sa le joalo, e le ho fumana se tsekoang ka botlalo, Leihlo la Basotho le atametse mahlakore ka bobeli ho itlhakisa. Morena Theko o hlalosa hore mohla qoaketsano, Ramainoane o ile a mo fumana Qoatsaneng (Maseru) a le setšeng seo a reng ke sa hae eaba Ramainoane o mo khobola ka bohale.
Morena Theko oa hlalosa: “O ile a fihla ke le setšeng sa ka mono Qoatsaneng. A fihla ka khalefo a bontša hore sebaka seo ke sa hae ‘me eaba ha ke lumellane le eena. Ke ile ka mo bontša hore sebaka seno esale e le seso; sa lelapa leso. Kahona, ke sitoa hore nka be se ke amohela a ikhapele sona ‘me re ile ra qoaketsana.
“Ka lebaka la hobane ke motho ea ithatelang publicity le hore a tsebe ho maneha litaba maqepheng a hae, u ile a nkuka fitieo and that made us hore ebe ha re lumellane.” Morena o hlalosa joalo.
Khoabane o itse ha a tsebe hore na Ramainoane o fumane setša seo joang: “Che ha ke tsebe hore o fumane setša seo joang. Ha motho a re feela, ‘this is my land, this is my land’ u ke ke oa mo botsa hofihlela re fihla kapele ho batho ba molao.” O rialo Morena oa Thaba.
Morena Khoabane o supa Ramainoane ka monoana hore a khaotse ho mo nka lifoto mohla qoaketsano [Image – Sebonomoea Ramainoane]
“Ho bile le khanyetso e hlahang ‘musong, e leng mohlomong Director of Land le Town Clerk. Ba ile ba etsa protest, that is why I am in court. Ke ne ke ile mono ka nako eno ke sa il’o qholotsa Ramainoane empa ke ne ke ilo sheba setša seo sa ka against the papers I have e tlo bontša [sic].
“Empa taba e nqhololitseng ke hore ke utloile hore Ramainoane o ntse a aha ntho eo a e bitsang sentry, moo e tla ba keiti eo a kenang kahara setša sa hae ka eona empa o hapelletse setša sa ka ha a etsa joalo.” Morena oa Thaba o lihella likhala.
Ho sa le joalo, Leihlo la Basotho le nontse monghali Ramainoane maikutlo holim’a litaba tsa qoaketsano ea bona ‘me a araba ka tsela ena: “Ae ‘m’e, ha se litaba tseo nka buang ka tsona likoranteng tseo.”
