MAIKUTLO A LDF KA ‘THIBELO’ EA MOLAOLI HO FANA KA THUTO NUL
Ka moqolotsi oa rona
La 5 Tšitoe 2023
Mokhatlo oa litsebi le barutehi, Academic Forum for Development of Lesotho (AFDeL), e leng mokhatlo oa barutehi ba National University of Lesotho (NUL) hammoho le litsebi tse ling kahare le kantle ho Lesotho o re o tšoenyehile ke qeto ea mookameli oa NUL ho mema molaoli oa sesole, Lieutenant General Mojalefa Letsoela ho ea fana ka thuto ea boeta-pele ka la 7 Tšitoe 2023 NUL. Letsoela o menngoe ke sekolo hoba se mo nka e le setsebi litabeng tsa boeta-pele.
Lengolong leo AFDeL e le ngolletseng mookameli oa NUL, e re eona e ile ea lokolla polelo ka la 19 Mphalane 2023 ho nyatsa le ho tšoela ka mathe polelo e ileng ea etsoa ke baokameli ba litsi tsa tšireletso ka kopanelo, “Polelong ena baokameli ba ile ba tšosa ka ho liha ‘muso ka la 16 Mphalane 2023. Polelo eo e ne e kopanetsoe ke Lesotho Defence Force (LDF), Lesotho Mounted Police Services (LMPS), le National Security Services (NSS).”
“Polelo ea bona e ne e phephetsa litaba tsa paramente; baokameli ba litsi tsa tšireletso ba ne ba laela hore na maparamente a etseng a se ke a etsa eng.
“Rona joalo ka mekhatlo e meng ea sechaba, re tsitlalla pusong ea sechaba ka sechaba ‘me re ntse re lomahantse meno hore polelo eo e ne e le ka thoko ho molao, hape e khahlanong le puso ea sechaba ka sechaba ebile e ea nyelisa. Ka nepo ho ne ho lokeleha hore mahlakore a amehang a e hule le ho kopa tšoarelo.
“Lt. General Letsoela le bo-mphato oa hae ha ba ka ba mamela khoelehetso ea sechaba hore ba kope tšoarelo hofihlela joale.
Lit. General Mojalefa Letsoela
“Kajeno re makala ho bona NUL e khetha ho ba khahlanong le litebello tsa sechaba, boemong ba tikoloho le ba machaba ho sireletsa litšiea tsa puso ea sechaba ka sechaba. Ho ea ka moetlo oa lihlapiso tsa NUL, lithuto (lectures) li fanoa ke litsebi tse ananeloang ka botsebi ba tsona, ho latela boiphihlelo, le tsebo litabeng tseo li tlo fana ka thuto ho tsona.
“Ke maikutlo a rona, ebile re beha ho uena hore moeti enoa ha a boemong ba ho fana ka thuto eo ebile ha a fihlele lipehelo tsa hore ke setsibi tabeng eo ho thoeng a tlo fana ka thuto ho eona.
“Memo ea hae e tlisa leru le letšo tabeng eo hammoho le ho thunthetsa boleng ba litšiea tse ntle tsa boeta-pele.” Lengolo le rialo.
Ka mabaka a rapalalitsoeng lengolong, AFDeL e re khahlanong le memo ea Lit. General Letsoela ka hore a tlo fana ka thuto ea boetapele feela a bonahala a sa sireletse litšiea tsa puso ea sechaba ka sechaba tseo a neng a lokela ho li sireletsa hammoho le ho sireletsa molao le khutso ekasitana le molao oa motheo.
AFDeL e totobatsa e le khahlanong le memo ea Letsoela kaha e re seo ke ho nyelisa pono ea NUL ka boetapele bo tsoileng matsoho.
“Ho feta mona memo ea Lt. General Letsoela hammoho le Motlotlehi bat lo lula le Mookameli oa Sekolo ebile ho menngoe Mobishopo oa Kereke ea Chache, feela ho bile le lipuo tsa sepolotiki tsa haufi ho tla tsosetsa sechaba maqeba. Ka hona, re kopa hore memo ea Lt. General Letsoela e hlakoloe.”
AFDeL e re haeba NUL le Moshoeshoe Institute li tsitlalla hore Lt. General Letsoela a tsoele-pele ho tla fana ka thuto e ipiletsa hore ho etsahale tjena:
Matichere a NUL le basebetsi, baithuti le sechaba ka karetso ba hane (boycott) ho tla thutong ena. Ho feta mona, ba ipiletsa ho Mobishopo oa Kereke ea Chache ho ikhula hore e se be karolo tšebeletsong ena.
“Taba ea ho qetela ke hore re kopa ofisi ea Motlotlehi e re fe tumello ea ho eletsa Motlotlehi le Mookameli oa Sekolo ho inahana-bocha hore Motlotlehi a se be le seabo tšebeletsong ena.
Ho sa le joalo, Leihlo la Basotho le nontse mookameli oa liphatlalatso LDF, Lieutenant Colonel Sakeng Lekola maikutlo holima likateng tsa lengolo lena: “Ha re na ba le maikutlo lengolong le sa ngolloang rona; re le bone ho marang-rang mono. Rona ha rea fumana lengolo le joalo, ha re na maikutlo lengolong leo.” Lit. Colonel Lekola oa hlalosa.
Moqolotsi o ile a botsa hore na taba ee ha e le moo e ama molaoli oa sesole ba reng: “Che mona, re le sesole re lumela tabeng ea hore batho ba phela nakong ea freedom. Re le sesole sa Lesotho re lumela hore batho ba phela ka freedom e leng freedom of speech, freedom of association. Re ke ke ra hanela beng ba lengolo ho ntša maikutlo ka moo ba entseng ka teng kapa ra ba sitisa ho ntša maikutlo a bona ka moo ba bonang litaba ka teng. Rona ha re na maikutlo.” O phethela joalo Lieutenant Colonel Lekola.
Ka lehlakoreng le leng, puisanong le mookameli oa Lekhotla la Baithuti NUL, monghali Tumo Tsanyane o itse bona e le Lekhotla la Baithuti ha ba ikamahanye le litaba tsa botsamaisi ba sekolo. “Rona re tlo ea thutong eno, litaba tseo re bona eka li ama batho ba nang le national concern, rona taba ena ha e re ame, re tla be re ile mono.” Tsanyane oa phethela.
