LEKHOTLA LE LAELA SEPOLESA HO PHENYEKOLLA HA MOFOMOBE

LEKHOTLA LE LAELA SEPOLESA HO PHENYEKOLLA HA MOFOMOBE

Ka Moipone Makhemeng

La 4 Tšitoe 2023

Lekhotla la ‘Maseterata oa, Maseru le ntšitse taelo ea ho phahlolla ka sepheo sa ho batla sethunya (Search Warrant) lelapeng la moparamente ebile e le moeta-pele oa Basotho National Party (BNP) Machesetsa Mofomobe.

Tokomane ea lekhotla e re ho na le leseli le pelaelo ea hore lithunya tse sebelisitsoeng tlolong ea molao li teng lapeng la Mofomobe, Ha Thetsane, Maseru.

“Libetsa tsena lia hlokahala kaha li tlo sebelisoa molemong oa lipatlisiso. Har’a tsona ke sethunya sa 9mm.” Lengolo le baleha joalo.

Ho sa le joalo, maobane hoseng sepolesa se ile sa fihla lapeng ha Mofomobe se ntse se ‘matla empa mofumahali oa hae ‘Mantai Mofomobe a hlalosa a le sieo. Ke moo mapolesa a ileng a kena ka tlung a mo sheba likamoreng tsohle a nt’o tsamaea a sa mo fumana.

Ho sa le joalo, kajeno hoseng Mofomobe o ile a inehela sepoleseng sa Ha Mabote. Ke moo sepolesa se ileng sa tsamaea le eena ho ea lapeng. Ho ea ka lipehelo tsa tokomane ea ho phenyekolla, mapolesa a ile a phahlolla hohle likamoreng tsa ntlo ea Mofomobe se batlana le sethunya sa 9mm. Leha ho le joalo, mapolesa a ile a qeta tšebetso ea ho phahlolla empa ha a ka fumana sethunya seo.

Tokomane eo e bonts’a hape hore lithunya tse boletsoeng li tla fana ka bopaki mabapi le tlolo ea molao e etsahetseng. E boetse e hlalosa hore ha li ka fumanoa li tla fuoa lekhotla kamora lipatlisiso ‘me molao o sebetse.

Ha joale Mofomobe o ntse a le matsohong a sepolesa sa Ha Mabote a SOU joalokaha a ile a inehela ho sona hoseng ‘me o lebile le bona lapeng Ha Thetsane.

Ho sa le joalo, moetapele oa Democratic Congress (DC), Mathibeli Mokhothu o bile teng nakong eo mapolesa a ntseng a phenyekolla ntlo ea Mofomobe. A bua le Meloli Air Waves, o itse ketso e etsahetseng lapeng la Mofomobe ke ketso e soabisang haholo. A re litho tsa ts’ireletso ha li ea lokela ho itumella ho sala bapolotiki morao. A toboketsa hore li tlameha li sebetse hobane li loants’a tlolo ea molao joalokaha li ka etsa ho batho bohle.

“Hona ke witch-hunt moo ho lelekisoang baeta-pele paramenteng. Ha ho na ‘muso o emisoang ke litsi tsa ts’ireletso. ‘Muso ha o qala o sebelisa litsi tsa ts’ireletso tjena hona ke mats’oao a hore ‘muso o felletsoe ke matla sechabeng mane.” Mokhothu o rialo.