MOHLANKA OA DCEO O TŠOEROE
Ka moqolotsi oa rona
La 2 Ts’itoe 2023
Kajeno ofisiri e ‘ngoe ea setsi sa Toantšo ea Bobolu le Bomenemene (Directorate on Corruption and Economic Offenses – DCEO) e lletsoe ke litšepe. Ho thoe e jele tlotjo ea batho ka linyeoe tsa maiketsetso.
Ho ea ka mookameli oa DCEO, Adv. Knorx Molelle o re ba ile ba fumana menyenyetsi ea hore ho na le e mong oa mafokisi a DCEO ea ithuisitseng ka ho ea sechabeng a se tšepisa ho hlakola linyeoe tsa bona tseo a neng a re li teng DCEO empa a le leshano.
Molelle oa hlalosa: “Re bua ka motho a le mong mona; ketsahalong ea pele, o batlile M150 000 ho motho a re motho eo o na le nyeoe DCEO.
Ha se le hore ho na le linyeoe tse joalo, motho enoa o ne a bopa linyeoe tse sieo, joale a ea sechabeng a fihla a ntse a re, ‘u na le nyeoe mane DCEO patala bokana re tla e hlakola case e joalo. Batho ba ne ba lelekisoaa ka litokete tse sieo ho thoe ba patale lichelete.” Ke eena eo, a bolela hore ‘melaelloa o tla hlaha khotla ka Mantaha.
Molelle o re o kene ofising ho tla loantša bobolu ‘me o batla ho qala ho bo hlaola kahara DCEO. “Ntja kajeno e itlhotlhora matsetse; u ka re u loantša bobolu joang le uena u le sebolu? Sechaba se lokela ho re tšepa hobane nako e telele ho tumme DCEO e sebetsa ka lekeke. Honajoale re batla ho fetoha.” Molelle o rialo a bua le lebota la PCFM la marang-rang ba le mapatlelong a DCEO. O ipilelitse ho sechaba hore se atamele DCEO ho tlaleha liketso tsa bobolu.
