‘MUSO O BOLOKA BAFU BA MALAHLEHA BA 29
Ka Moipone Makhemeng
La 19 Mphalane 2023
Hangata motho ha a ntse a phela ha ho mohla a nahanang ka tsa mohla lepato la hae, hore na ebe ke mang ea tla ba teng; ke mang ea tla hlonama haholo le hore na litšebeletso tsa lepato li tla hlophisoa joang.
Sena e bile ‘nete e bohloko kajeno ha litopo tse mashome a mabeli a metso e robong (29) tse sa tsejoeng li bolokoa mabitleng a Lepereng, Maseru.
Bafu ba bolokuoe sets’eng sa bafu lepereng, Maseru
Litopo tsena li phuthuoe ke sepolesa ho tloha ka selemo sa 2020 ‘me esale li bolokoa ‘moshareng oa Lesotho Funeral Services (LFS). Sepolesa se lekile ho batlisa litopo tsena empa se hlolehile ho fumana ba malapa lilemo tse tharo kaofela.
Ka lebaka leo, ‘moshara oa LFS o sebelitse ’moho le ofisi ea tona-kholo, ho boloka litopo.
Ea buileng lebitsong la ‘moshara, ‘Maliteboho Mohlakoana, o boletse hore lebaka leo ba iphumaneng ba tlameha ho ba le seabo lepatong la bafu bao, ke hobane ba ile ba etsa boithuto hore lipetlele tsa ‘muso ha li boloke litopo tsa malahleha nako e telele ‘me seo e ba qholotso e kholo tšebetsong ea sepolesa.
‘Maliteboho Mohlakoana, o buile lebitsong la Lesotho Funeral Services
O re ke ka hona ba ileng ba kena selekaneng le ba ‘muso hore ba tla boloka litopo tsena. A hlalosa hore ketso ena ke ho busetsa ho Basotho kaha ke bona batšehetsi ba bona khoebong.
O hlalositse hore selemong sena e le botsamaisi ba ‘moshara ba ile ba ea ofising ea tona-kholo ba kopa thuso ofising ea mohlomphehi Limpho Tau e le kopo ea ho pata bafu bana. O itse letona le ile la ba tšepisa ho ba thusa ‘me kajeno o fetse o phethahalitse.
“Litšenyehelo tseo re keneng ho tsona ho tloha 2020 ho fihlela joale ho sebetsana le bafu bana hore ba lule ba le maemong a matle hore litopo li se senyehe ke M725,000.00.
Ho eona mono re ne re bona re ba le qholotso ea hore ha re itjara re tlo ba le tlhoko ea makese.
“Eaba re kopa ofisi ea tona-kholo hore e re rekele makese, ra re rona re tla kenya letsoho ka litšenyehelo tsena tsa ‘moshara, ho boloka bafu le li-chemical tseo chelete eo re e sebelisetseng hofihlela hona joale e feta M600, 000.00.
“Re ile ra ikeletsa hore re ke ke ra re ‘muso o patale chelete eo, re nka e le moo re kentseng letsoho ho khahlametsa sechaba hobane khoebo ea rona e tšehelitsoe ke Basotho.” Mohlakoana oa hlalosa.
Ho sa le joalo, Mookameli oa sepolesa, Holomo Molibeli, o hlalositse hore litopo tse ling li phuthuoe khale ebile li fumanoa li se maemong a matle.
Sechaba se bile teng ho felehetsa bafu
O lebohile mapolesa ka boitelo ba bona tšebetsong, a boela a leboha LFS le sechaba ka kakaretso tšebelisanong-‘moho eo ba bileng le eona.
Ho tloha moo, o ipilelitse ho sechaba ho khaotsa ka mothamahane oa bosiu kaha a re ketso eo, ke e ‘ngoe e susumetsang lipolaeano mahareng a sechaba.
“Re le mapolesa, ruri re rata ho ipiletsa ho sechaba sa Basotho hore, oho hle! Rea bona hore ho ea bolaeanoa, rea bona hore ka matsatsi ‘ohle re bala litopo.
Holomo Molibeli, Mookameli oa Sepolesa, o re batho ba khaotse ho ea majoaleng bosiu
“Sechaba se khabane taba ena e lokela e lekoloe ke rona re le sechaba ka kakaretso hore e ee moriting. Ba bolaeang le bona ba lokela ho utloisisa hore taba eo e mema boiphetetso hoba le bona ba tla qetella ba bolauoe.
“Ka hona, ke ipiletsa ho sechaba sa Basotho hobane rea bona hore tse ling tse etsang hore ho be le bafu ba bangata ke tsena tsa majoala a bosiu. Bo-ntate le bo-‘m’e ha re tloheleng ho ea majoaleng bosiu.
“Taba ena ea hore ha ba bang ba robetse ebe ho na le marata a lik’humba-k’humba e etsa hore hoseng ha re tsoha feela ebe re utloa ho se ho thoe setopo!” Holomo o li beha joana.
Ka ho tšoana, Mokhethoa oa lebatooa la Majoe-a-Litšoene mohlomphehi Mothofela Ramakatsa o itse taba ea mofuta o tjena e etsahala hangata ea litopo tse bolokoang li sa tsoejoe. A kopa sechaba le malapa hore ba nke boikarabello. O llile ka hore ho oa makatsa hore sepolesa se tla phatlalatsa bafu ba fumanoeng ebe beng ka bafu ha ba hlahelle.
Mothofela Ramakatsa, mokhethoa oa Majoe-a-Lits’oene
Lebitsong la ‘muso, letona ofising ea tona-kholo mohlomphehi Limpho Tau o ile a supa hore leha bafu bao ba hlalosoa ba sa tsejoe, bona e le ‘muso ba ka se ba lese feela.
A re ba lokela ho nka boikarabello ho boloka bafu bao ka lepato le hlomphehang.
“Leha ‘muso o nka boikarabello ho boloka Basotho bana, rea tseba re le Basotho hore ha ho monate ha motho a bolokoa ba habo ba le sieo.”
Limpho Tau, letona ofising ea tona-kholo
“Ho boetse ho bohloko ho lelapa ha le sa boloke ngoana lona.” Ke eena a bontša hore ha lelapa le bolokile moamani oa lona seo se fetoha matšeliso.
