MASHOLU A UTSOA M40 000 SEKOLONG SA ‘MUSO
Ka Moipone Makhemeng
La 13 Mphalane 2023
Chelete e fetang M40 000 e tlalehoa e utsuoe ke masholu sekolong sa ‘muso – Moorosi High School, Quthing. Litaba tsena li tiisitsoe ke mosuoe-hlooho oa sekolo seo monghali Matloko Mafantiri puisanong le Leihlo la Basotho kajeno.
Mafantiri o hlalosa ba lemohile bosholu bona hoseng hoa la 6 Mphalane 2023. O re linokoane li ile tsa pshatla fesetere tsa qhaka ka tšepe ‘me tsa kena ka siling tsa e phunya eaba li hohobela libaka se ngata tsa liofisi tsa sekolo li batla seo li ka se utsoang. Ho bonahala ho utsuoe chelete eo boholo ba eona e leng ea theko ea junifomo ea sekolo ho tsoa ho batsoali.
Mafantiri o bontša hape hore chelete e utsuoa tjena ba ne ba lokela hore ebe ba patetse motho ea ba rokelang junifomo pele likolo li koalloa boipuso empa ka bomali-mabe ba hlaheloa ke litaba tsena tse bosula.
“Ntlheng ea hore na chelete e utsoitsoeng ke bokae, re se re hakanya feela (kaha e feta M40 000) hobane joale matichere a na le mekhatlo ‘me a beha chelete mono. Batho ba ntse ba re rona re ne re tšetse bokana… Chelete e nkuoeng boholo ke ea junifomo eo re neng re tlameha ho patala batho ba re rokelang eona. Batho bohle re ba patala ka banka empa joale kaha bona ke batho ba tlang hoane le hoane, bona re ba patala kontane (cash).” Mafantiri o li beha joalo.
Potsong ea hore ba belaela ka mang o supile hore ha ba na ‘melaelloa kaha batho ba neng ba tseba mabeo a chelete eo ba ne ba le bangata. Ketsahalo ena Mafantiri o hlalositse e le lekhetlo la pele e ba hlahela sekolong.
O lihelletse likhala ka ho supa hore sepolesa sa Quthing se thakhotse lipatlisiso mabapi le bosholu bona empa a re ha ho batho ba seng ba tšoeroe.
