LETŠENG E NTŠA PUO KA TLHEKEFETSO EA MOSALI
La 13 Loetse 2023
Ka Moipone Makhemeng
K’hamphani ea Letšeng Diamonds e ntšitse polelo maobane mabapi le litaba tse hlahelletseng ho e ‘ngoe ea likoranta tsa marang-rang (Voice of Nation Media) ka la 11 Loetse 2023. Koranta e ne e phatlalalitse sello sa sehlopha se ipitsang basali ba tšoenyehileng ba Letšeng “Extremely Concerned Female Employees on Site” ka tlhekefetso ea mosali morafong oo.
Ho ea ka mangolo a balli, ba bontša ba khathetse matla kaha ba lemoha hore sello sa bona ha se mameloe, ebile se qheleloa ka thoko ke bookameli.
Lengolo la pele le ngotsoe ka la 12 Phupu 2023 ‘me le supa hore lehlatsipa la tlhekefetso ea motabo la mosali le ile la ngolla bookameli tletlebo khahlanong le e mong oa baokameli morafong, eo ba reng o ile a etsetsa eo tlhekefetso e lebisang petong (sexual harassment).
“Re ngola tletlebo ena re ikopantse re le sehlopha sa basali ba tšoenyehileng morafong oa Letšeng. Ke taba e tsejoang hore mosebetsi-‘moho le rona oa mehleng ebile e le motsoalle oa rona, (ba mo bolela ka lebitso) o ile a hlahlela tletlebo ho bookameli khahlanong le eo e neng e le mookameli oa hae lipakeng tsa Phupu le Phato 2020.
“Haesale tletlebo e riteloa ha ho khato e nkiloeng. Ke selemo sa boraro joale taba ena e sa sebetsoe ‘me re soabile haholo ke boemo bona.” Le rialo lengolo.
Lengolo la tletlebo le boetse le supa hore ‘melaelloa o ile a sulafeletsa lehlatsipa mosebetsi ka ho le nyopa-nyopa hoo le qetelletseng le itokollotse mosebetsing.
Ba boetse ba re ba ile ba hlolloa ha bookameli bo phahamisa ‘melaelloa maemong a tšebetso feela a na le litaba tse mo setseng morao tsa ho hlekefetsa mosali.
Lengolo la bobeli le ngotsoe ka la 28 Phato 2023. Mona balli ba re ba lekile maoala a ‘maloa ho tlaleha taba ea tlhekefetso e etsahetseng mosebetsing ho e mong oa basali empa ha ho nko ho tsoa lemina.
“Ho thola hoa bookameli tletlebong ea rona ho re fa khoao ea hore e se re bookameli bo khothaletsa tlhekefetso ea basali mosebetsing.
Morafo oa Lets’eng, Mokhotlong
“Taba ena e re ho rona, litokelo tsa baetsi ba tlhekefetso ea motabo li bohlokoa ho feta tsa lehlatsipa.”
Balli ba boetse ba bolela eo ba reng ke mohlekefetsi ka lebitso ‘me ba manehile foto ea hae lengolong la bona.
Ho sa le joalo, Letšeng e lla ka hore koranta ea marang-rang ha e tlaleha litaba tsena e manehile lengolo la tletlebo le nang le letšoao la molao (letter head) la morafo.
Likateng tsa polelo ea morafo li totobatsa hore Letšeng e tseba litaba tse ka hara mangolo a mabeli a ngotsoeng ke sehlopha se ipitsang “Extremely Concerned Female Employees on Site” a neng a ngotsoe ho hlabela morafo patsana ka pelaello ea botlokotsebe bo etsahalang moo.
Letšeng e bontša hore e fana ka sethala seo basebetsi bohle ba ka tlalehang (ba sa tsejoe haeba ba rata), ketso efe kapa efe ea boitšoaro bo sa tsamaellaneng le Melao ea Boitšoaro ea Letšeng. Litlaleho tse joalo li batlisisoa ka botlalo ‘me li sebetsoa ka mokhoa o nepahetseng.
Letšeng e re litaba tseo ho thoeng li ngotsoe lengolong la pele li ile tsa fuputsoa ka botlalo ‘me tsa tlalehoa ka nepo. Leha ho le joalo, polelo e re lipatlisiso ha li’a fumana mapaki a tšoarehang mabapi le liqoso tse entsoeng khahlanong le ‘melaelloa ke sehlopha se boletsoeng.
Letšeng e re koranta ea marang-rang e ngotse litaba tseo ho se netefatso e entsoeng pele li ka manehoa. K’hamphani e boetse e lla ka tšebeliso ea matšoao a eona (letter head) mangolong a balli.
Motse o haufi le morafo oa Lets’eng, Mokhotlong
“Letšeng Diamonds ha e mamelle tlhekefetso ea mofuta ofe kapa ofe khahlanong le bahiruoa ba eona, ke ka hona e faneng ka mehala e sireletsehileng bakeng sa basebetsi ho tlaleha liketso life kapa life tse tlolang melaoana ea k’hampani le ho sebetsa litaba tse joalo ka lekunutu.
“Sena se thusitse k’hampani hantle ka ho sebetsana le ho laola mekhoa e sa amoheleheng.
“Ka polelo ena, re fana ka tiisetso ea hore liqoso tse joalo li ile tsa sebetsoa ka nepo hoa lateloa methati e nepahetseng ka hare ho k’hamphani.
“Re rata ho supa hape hore mangolo ao a ngotsoe ho sebelisoa letšoao la molao la Letšeng ka thoko ho molao ‘me ho lokela ho hlaka hore mangolo ao ha se a Letšeng empa ke a sehlopha seo se neng se teka lillo tsa sona.” Lengolo le lihella likhala joalo.
