BASOTHO BA 15 BA KENA TSIETSING NEWSCASTLE
Ka moqolotsi oa rona
La 13 Loetse 2023
Litho tsa tšireletso li tlalehoa li ile tsa tsoa letšolo ho hlahloba litokomane tsa melata e sebetsang lifemeng tsa Newcastle, Natala maobane.
Ho ea ka koranta ea Newcastillian, ke letšolong lena moo sepolesa se tšoereng melata e 15 e sebetsang lifemeng tseo e se na litokomane tsa molao tsa ho sebetsa Afrika Boroa.
“Letšolo leo e bile karolo ea matšolo a boemo bo holimo koano Newcastle ‘me re atlehile ho tšoara melata e 15. Kaofela ha batho bao ke matsoalloa a Lesotho ‘me re ile ra ba isa setokising sa sepolesa Newcastle.” Ho rialo Arumugam sebuelli sa sepolesa Durban .
Arumugam o re babelaelloa ba tla hlaha lekhotleng la ’maseterata oa Newcastle bekeng ena. “Kamora ho hlaha lekhotleng, ba tlil’o nehelanoa ho ba lefapha la malibohong ’me bona ba tlo ba khutlisetsa naheng ea bo-bona (deportation).” O tlatsetsa joalo Arumugam.
Monga feme ha e-s’o tšoaroe feela sepolesa se re se tlo mo phenya mahafi ho fumana hore ho tlile joang hore a hire melata e se nang tumello ea ho sebetsa Afrika Boroa.
