IEC E FANA KA TLALEHO EA LICHELETE TSE ABETSOENG MEKHA
Ka Moipone Makhemeng
La 6 Loetse 2023
Komisi e Ikemetseng ea Likhetho (Independent Electoral Commission – IEC) e bile le ’moka oa baqolotsi ba litaba maobane, liofising tsa eona MGC Park, Maseru. Sepheo e bile ho fana ka tlaleho ea lichelete tse fanoang ke IEC ho mekha ea lipolotiki e ingolisitseng le eona ekasitana le e nang le litulo ka paramenteng.
Mookameli oa Likhetho oa Komisi, Adv. Mpaiphele Maqutu o teketse baqolotsi hore Komisi e abela mekha ea lipolotiki chelete ka mekhahlelo e meraro; o re chelete eo e tsoa mokotleng oa ’muso. Mokhahlelong oa pele, Komisi e abela mekha chelete ea boiketo ba likhetho (Campaign Funding) ka nako ea likhetho tse akaretsang.
Mokhahlelo oa bobeli ke chelete e abeloang mekha eohle e nang le litulo paramenteng kamora likhetho (party funding). Chelete ena mekha e abeloa selemo le selemo ho ipapisitsoe le palo ea litulo tsa mokha ka mong paramenteng. Ena ke chelete eo Adv. Maqutu a hlalositseng e le e fuoang mekha ho e thusa ho phela, joaloka ho patala rente moo e sebeletsang le litjeo tse ling tsa mekha. O rapalalitse hore sena se etsoa ho latela molao oa likhetho.
Mokhahlelo oa boraro ke moo Komisi e abelang mekha chelete ho lefa baemeli ba eona ba likhetho (party agents) ka nako ea likhetho tse akaretsang.
Maqutu o hlalositse hore mekha eohle e tlangoa ke molao ho fana ka litlaleho tsa tšebeliso ea lichelete tsohle tseo e li amohetseng ho tsoa ho Komisi.
Ha IEC e abela mekha chelete ea boiketo ba likhetho, mona e ipapisa le hore na mekha ea khale e ne e sebelitse joang likhethong tse fetileng (2017).
Boiketong ba likhetho tsa 2022, M5 milone e abetsoe mekha. Maqutu o supile ha 80% ea chelete ena e abetsoe mekha e bileng le seabo likhethong tse fetileng ho ea ka tšebetso ea tsona.
Ho M5 milone, mokha o neng o le kaholimo-limo ka lipalo ke All Basotho Convention (ABC) ’me o abetsoe M1.6 milone ea boiketo ba likhetho . Mokha o hlahlamang, e leng Democratic Congress (DC) o abetsoe M979, 000 e le chelete ea boiketo ka ho tšoana.
Mookameli oa likhetho o itse 20% e salang e abetsoe mekha e qalang ho iketela likhetho lekhetlo la pele. Mona mekha e kang Revolution for Prosperity (RFP), United for Change (UFC), Socialist Revolutionaries (SR) le e meng e abetsoe M21 214 ea boiketo.
Mokhahlelong o hlahlamang, chelete e abetsoeng mekha e nang le litulo paramenteng kamor’a likhetho ke M3.3 milone. Maqutu oa hlalosa: “Mekha le makhotla ’ohle a nang le setulo kapa litulo ka Ntlong ea Bakhethoa a fumana chelete selemo le selemo re itšetlehile holim’a litulo tseo ba nang le tsona.
“Kakaretso ea chelete eo re fanang ka eona ho mekha le makhotla ke M3.3 milone. Mokha kapa lekhotla le ileng la fumana litulo tse ngata ka ho fetisisa le ile la fuoa chelete e kaalo ka M1,96,470.58 (mona o bua ka RFP). Mekha e ka tlaase-tlaase e fumaneng setulo se le seng e fumane M76 470.58.” Maqutu o rialo.
Mokha oa RFP o abeloa M1,9 milone kaha o na le litulo tse fetang tsa mekha e meng paramenteng
Mekha e nang le setulo se le seng e kenyeletsa United for Change (UFC), Basotho Patriotic Party (BPP) le e meng. Chelete ena ke eane e fanoang selemo le selemo e thusang mekha ho phela.
Mokhahlelo oa boraro ke chelete e fanoang ho mekha ho lefa baemeli ba eona likhethong tse akaretsang.
Ho ea ka Maqutu, ka Tlhakubele monongoaha, mekha e fuoe kakaretso ea M20 milone ho lefa baemeli ba mekha likhethong tse fetileng.
Tlaleho ea IEC e boetse e senotse hore ke mekha e leshome le metso e mene (14) feela e faneng ka litlaleho tsa eona tsa lichelete tsa baemeli ba mekha (party agents). Maqutu o phafile mokha o ipabolang ka litlaleho tsa lichelete e leng Alliance of Democrats (AD). Ho feta mona, o hlalositse hore ho na le mekha e mehlano e-s’o fane ka litlaleho hofihlela hajoale.
O hlokomelisitse hore mekha e hloloang ho fana ka litlaleho, Komisi e tlo e nkela likhato tsa molao makhotleng.
“Re ngotse mangolo a ‘maloa ho tloha ka la 9 Pherekhong 2023. La pele le batlile tlaleho ea lichelete tsa boiketo (campaign funding), ka ba pheta hape ka la 15 Tlhakubele 2023 ke re ba hopole ho fana ka litlaleho. Ka la 24 Tlhakubele 2023 ke ile ka ngolla bangoli-kakaretso ba mekha ke ntse ke ba hopotsa hore tebello ke hore Motšeanong litlaleho li be li felletse ‘me le lichelete tse sa sebelisoang li khutlela mokotleng oa IEC.” Adv. Maqutu o rialo.
Tabeng ea litlaleho tsa lichelete tseo mekha e li fumaneng e le liphalello ho tsoa ho bafani, Maqutu o re ba lebelletse hore mekha e fane ka tlaleho ea ho kena hoa lichelete tseo.
Maqutu o itse likhethong tse fetileng ho bile le tlaleho ea chelete ea bafani e keneng ’me a re ke mokha o le mong feela o faneng ka tlaleho e leng; Revolution for Prosperity (RFP).
