MOK’HANSELARA, RAKHOEBO BA FENETHOA MPHOSONG
Ka Moipone Makhemeng
La 28 Phato 2023
Lebatooa la Mphosong, Leribe le ile la apareloa ke leru le letšo bekeng e fetileng ka Laboraro le Labone ka tatellano ha likoeta li fenetha Mok’hanselara oa Bolahla, Likhutlong Ha Mokiba, Pitseng Leribe ka Laboraoro, mofu Motsamai Sello hammoho le rakhoebo, oa Ntširele Matlameng, mofu Samuel Tshabalala. Mofu Tshabalala o boetse e ne e le ralipolotiki oa mokha oa Lesotho Congress for Democracy (LCD) ea neng a emetse likhetho lebatooeng leo ngoahola.
Leihlo la Basotho le buisane le mokhethoa oa Mphosong, mofumahali ‘Mamokete Ntšekhe ea hlalositseng hore na mok’hanselara ho etsahetse joang ha a tla bolaoa. Eena o li behile joana: “Mok’hanselara o ile a hlaseloa ha hae bosiu ba Laboraro. Eka linokoane ha li fihla ho ile hoa utloahala mokutu ‘me lintja tsa bohola ka matla.
‘Mamokete Nts’ekhe, mokhethoa oa Mphosong [Image via National Assembly)
“Ba ile ba bula ka liotoropong ba tlhotlhorela fatše ekasitana le ka lisoitik’heising ba tlhotlhorela fatše. Ba boetse ba hapa chelete e kaholimo ho M12 000 e ntate Motsamai a neng a tsoa le eona mokhatlong.” O rialo.
Mokhethoa o re likebekoa li ile tsa nka thelefishini le lithepa tse ling eaba li siea li fasitse mofumahali oa mok’hanselara.
Ha ba se ba ile mofumahali o ile a etsa matsapa a ho iphasolla ‘me a atleha. Ha a tsoela kantle a fumana hore monna oa hae o rapalletse fatše ho shebahala a kapuoe ka sabole, a se a timetse.
Mokhethoa o hlalositse lebatooa la habo le lahlehetsoe haholo ke mafu ana.
“Bafu ka bobeli ke batho ba bohlokoa haholo kahara lebatooa la Mphosong. Ntate Motsamai ke moetapele oa ED ea Bolahla hape o ne a tšoere le tikoloho ea Tsoinyane kaha mok’hanselara oa moo a ile a hlokahala.
“Re lahlehetsoe haholo hobane ntate Motsamai o ne a tšoere ka natla likomiting tse maloa, tsa tikoloho, bohokela le boipoleso ekasitana le moetlo. Re boetse re lahlehetsoe haholo ke Ntate Sam Tshabalala hobane eena re ne re le lipolotiking mona a emetse LCD ha ‘na ke ne ke emetse RFP likhethong tse fetileng. Ntate Sam o ne a thusa sechaba sa Matlameng haholo ‘me ke hlabehile ke mafu ana. O ne a ba thusa ho ba atameletsa lintho tse ngata etsoe tsela ea Matlameng e le e mpe ka ho fetisisa.” Mokhetha o li kobella ka tsela eo.
Ho sa le joalo, Leihlo la Basotho le buisane le morena oa Ntširele, Matlameng mofumahali Masokane Makhethe ea hlalositseng tsa polao ea mohoebi. O hlalosa hore khoebong ea monghali Tshabalala ho fihlile motho ea sa tsejoeng ka shoalane ha nako e ka ba 7pm Labone. O re monna eo o ne a ikhakantse sa mokana eka o tlo reka athe e ne e le sehloela se neng se il’o hlahloba maemo.
Monna enoa o hlalosoa a ile a reka bohobe le seno-mapholi a nt’o tsamaea empa hamorao a khutla ba se ba le bararo ba hlasela mohoebi.
“Ha a se a khutla hape ba kene ba se ba le bararo ba fihla ba thunya monga lebenkele ekasitana le ho mo kabaka ka selepe. Ba bile ba nka chelete ka lebenkeleng hammoho le mechininyana le lifouno tsa bona.” Mofumahali Makhethe oa hlalosa. Mofu o timetse hang-hang empa mofumahali oa hae le mosebeletsi eaba ha ba ele hloko hore o se a timetse.
“Ka lebaka la letsoalo, ba ile ba mo nka ba mo kenya koloing ea hae ba nahana hore o ntse a phela; ke lingaka tse ileng tsa re ba khutle le eena tsa ba bolella hore motho enoa o isitsoe moo a se ntse a timetse.” Mofumahali oa hlalosa.
O boetse a tlaleha hore babelaelloa ba bararo ketsahalong e soto ena ba ile ba bolaoa ke sepolesa Maputse kamora ho leka ho hlasela khoebong e ‘ngoe sebakeng seo.
Oa phethela: “Ke utloa eka batho bano ba theohang Matlameng moo, ba bolauoe ba le bararo, enoa oa boraro ho thoe ke eena ea ileng a ntša ba bang. Ba bolaetsoe Maputsoe ba se ba kene ha mohoebi e mong. Enoa oa Matlameng ba ile ba mo lata hona ka habo ba mo bolaea ka ho mo chesa. Le eena o ile a hlalosa hore na o ne a na le bo-mang.” Mofumahali o li beha joalo.
Litaba tsena mofumahali Makhethe o re li mo lutse habohloko pelong. O boletse hore mohoebi a ne a ba thusa haholo. “Kannete ba mpolaile moeeng ‘moho le sechaba sa ka.” O li fera joalo!
Mofu o hlokahala a siea mofumahali le bara ba hae ba bararo.
