BABELAELLOA BA BOSHOLU BA M7 MILONE EA ECONET BA TŠOEROE
La 21 Phato 2023
Setsi sa Toantšo ea Bobolu le Bomenemene (Directorate on Corruption and Economic Offences – DCEO) se tlalehoa se qhaulitse banna ba babeli ba belalloang ba utsoitse ka masene a phokojoe M7,298,071.34 ea Econet Telecom Lesotho (ETL) ka Motšeanong 2023.
Tse ipetsang pele li re monna oa Mo-India ebile e le mohoebi Mafeteng, Monghali Ashraf o tšoeroe kajeno le mohlanka e mong oa Econet ka pelaello ea bosholu bona.
Babali ba tla hopola hore K’hamphani ea mehala, Econet Telecom Lesotho (ETL) e ile ea eloa ka liphalana ke mokhosheli ea butseng polokelo First National Bank lekaleng le Mafeteng. Tsotsi e ne e atlehe ho hapa M7,298,071.34 ka bokhosheli.
Chelete ena ke eo ETL e neng e nahana hore e e lefa polokelong ea Lesotho Electricity Company (LEC), athe ho na le seropo sa leqitolo. Bokhotho-khotho bona ke boo Econet e neng e lefa LEC chelete ea motlakase o rekiloeng ke sechaba ka sehlahisoa sa Ecocash khoeling ea ’Mesa 2023.
Nomoro ea polokelo ea mokhosheli moo limilone li ileng tsa hohlomela ho eona ke 62770427138 e butsoeng FNB, Mafeteng. Bomenemene bo ne bo tlalehoe Setsing sa Toantšo ea Bobolu le Bomenemene (Directorate on Corruption and Economic Offences – DCEO) ke bookameli ba Econet ka Motšeanong 2023.
HO ETSAHETSENG HA CHELETE E TLA EA HO TSOTSI?
Mookameli oa mehleng oa LEC, Mohato Seleke lipampiring tsa lekhotla o hlalosa hore LEC e ile ea fumana lengolo ka imeile le neng le re LEC e fetotse polokelo ea banka. Ho ea ka ‘lengolo’ leo la bokunyata mongoli ea neng a ikhakantse eka o sebetsa LEC o ne a tsebisa Econet hore LEC e fetotse polokelo ea Banka ho tloha ho Standard Lesotho Bank ho ea ho FNB.
Ke moo Econet e ileng ea sebelisa polokelo e ncha e fanoeng lengolong la tsotsi ea hohlometsa M7.2 ’milone ho leqitolo le sa tsejoeng!
Ho sa le joalo, lebitsong la LEC monghali Seleke o supa hore Econet e bile bohlasoa ka ho tšepa lengolo la lefoofo le ho hloloa ho netefatsa hore e tšela chelete polokelong e nepahetseng ea LEC. O re Econet e ne e tlameha hore ebe e lemohile hore letšoao (logo) la FNB lengolong la tsotsi ke la khale kaha FNB e ile ea phatlalatsa maselinyaneng hore e fetotse letšoao.
“Lengolo leno la lefofo ha le ea romeloa ka imeile ea rona (domain). Ho feta mona, polokelo e fanoeng ea FNB e butsoe Mafeteng. Ntlo-kholo ea LEC e Maseru ’me ha ho ka moo e ka bang le polokelo ea banka Mafeteng.
“LEC e rometse lengolo la mokoloto (invoice) oa ’Mesa le ileng la romelloa ka imeile ea Mohlanka oa Lichelete oa rona, ’Makarabelo Mosuoane a e romella oa mphato oa hae Econet, Tankiso Pholosi ka la 2 Motšeanong 2023 a kopa tefo ea motlakase oa khoeli ea ’Mesa.” Seleke o rialo lipampiring tsa Lekhotla.
Hang letsatsi le hlahlamang, imeile e bontšitseng e tsoa ho Mosuoane ka aterese e tšoanang e ile ea romelloa Pholosi e hlalosa hore polokelo ea banka e fetotsoe. Leha ho le joalo, Seleke o re imeile eno e ne e sa romeloa ho hlaha molikong oa li-imeile tsa LEC (domain).
Mohlanka e mong oa LEC ofising ea lichelete, Mokheseng Mofolo o ile a etsa tšalo-morao ho mohlanka oa Econet, Lerato Moletsane a botsa hore na tefo e se e rometsoe kapa che. Ke moo Moletsane a ileng a romela bopaki hore chelete e lefiloe polokelong ea FNB e boletsoeng.
LEC e tsitlalla hore eona ha e na polokelo FNB kaha e sebelisa Standard Lesotho Bank. Ho boetse ho na le pelaelo ea hore bakhosheli ba kena-kenane le marang-rang a Econet le LEC ho phethahatsa bomenemene bona. Nyeoe e tla tsoela-pele ka Mantaha ’me e mametsoe ke moahloli Moneuoa Kopo. ’Muelli oa Econet ke Adv. Motiea Teele athe Adv. Tekane Maqakachane o buella LEC.
