BASOTHO BA 500 BA FELLOA KE MOSEBETSI
Ka Moipone Makhemeng
La 7 Phato 2023
Ke bonyane Basotho ba makholo a mahlano (500) ba sebetsang femeng ea Lesotho Hippo Knitting (Pty) Ltd Maseru, ba felletsoeng ke mosebetsi monongoaha. Mathoasong a selemo sena ka khoeli ea Tlhakubele, ke basebetsi ba 240 ba ileng ba fokotsoa athe ka la 21 Phupu 2023 ho boetse ho fokolitsoe ba ka bang makholo a mabeli le metso hape.
Puisanong le e mong oa basebetsi ba feme eo, o netefalitse hore mohiri o ba file mangolo ka la 21 Phupu 2023 ho ba tsebisa hore ba tlil’o fokotsoa ‘me mosebetsi o felile. Mangolong ao mohiri o hlalosa a ne a lokela ho koala feme ka Pherekhong isao.
Maletsunyane 2023
Lengolo le re phokotso e bakiloe ke mathata a tšebetso kaha mebaraka le moruo oa lefatše li putlame ka lebaka la tlhokahalo ea chelete kahona tšebetso e mpe.
Leha ho le joalo, e mong oa basebetsi ka pelo e tletseng mahloele o itse ha se ‘nete hore ha ho sa na mosebetsi. O netefatsa sena ka ho supa hore ka Laboraro le fetileng, thepa ea mosebetsi e fihlile femeng ena. Ho feta mona, o boletse hore tlhaloso e ‘ngoe e hlahileng ho tsoa ho mohiri ke hore mosebetsi o tlil’o lebisoa femeng e ‘ngoe e neng e koetsoe e bitsoang Asia, Ha Thetsane.
Ha a tsoela-pele, o itse: “Ntho e teng ke hore bahiri bana ba melata ha ba batle ho patala chelete ea batho ba nang le nako e telele mosebetsing. Ba thabela ho patala bahiri ba nako e khutšoane kaha meputso ea bona e le menyane. Ba bone M50 tsena tse eketsoang selemo le selemo nyollong ea meputso li le ngata.” Oa tšoaela.
Mosebetsi o llile ka hore mohiri o tlo tsamaea ka mosebetsi oa Hippo Knitting a o lebise femeng ea Asia hore feela a hire batho ba bacha. A re mona o tla ba lefa cheletana e fokolang.
O boetse ka masoabi a bolella koranta ena hore moeta-pele oa mokhatlo oa bona oa basebetsi; Independent Democratic Union Lesotho (IDUL) monghali Mei Rathakane o ba tsoile tlaase kaha ha a sa loanela litokelo tsa bona e le basebetsi ‘me ba belaela hore o fuparisitsoe chelete ke mohiri.
Ho sa le joalo, puisanong le Leihlo la Basotho, Monghali Rathakane o tšetse litaba tsa hore o fuparisitsoe chelete ke mohiri ka metsi. A re ke mafosisa hore o tsoile basebetsi tlaase. Pelaelo ea hae ke hore ho na le batho ba tsoileng letšolo ho mo senya lebitso mokhatlong kaha ba sa shebele litaba ‘moho.
O pakahalitse hore mohiri ka Tlhakubele, ka lebaka la ho nyotobela hoa moruo oa lefatše, o ile a tsebisa basebetsi hore o tlil’o fokotsa mokhahlelo oa bobeli oa basebetsi kaha oa pele o fokolitsoe ngoahola.
Rathakane o re mohiri o fetse a fokotsa basebetsi ba 240 ka Tlhakubele empa ba mathela makhotleng ho loanela taba ena ba tseka mokhoa oa phokotso oo ba reng o ka thoko ho molao.
“Mohiri o ntšetsa-pele litaba tsane tsa Tlhakubele, honajoale ke mokhahlelo oa boraro ho oane oo a neng a o bolele. Litaba tsena ha re bua le uena li ka makhotleng.” Rathakane o rialo.
O thethile litaba ka hore basebetsi bana ba fuoe mangolo beke e fetileng ‘me le bona o ba lebelletse ho tla ofising tsa bona e le hore litaba li lebe makhotleng.
“Menyako ea rona e butsoe; re itse ba tle re ee lekhotleng. Ho na le ba bang ba tlileng ‘me ba se ntse ba kenya linyeoe.” Monghali Rathakane o fera joalo.
