MONNA OA LESOTHO O SHOELLA KHAREBE NATALA
La 26 Phupu 2023
Monna oa Lesotho, ea neng a il’o batla mosebetsi Natala, Tholang Mare (24) ke mofu kamor’a ho nyekenyoa ka thipa ka Sontaha hoseng, Emhosheni, Mpophomeni, Howick, Natala ke monna ea lilemo li 28.
Ho ea ka koranta ea The Witness, pelaelo ke hore ho bile le qoaketsano lipakeng tsa mofu le kharebe ea ‘melaelloa.
Tlaleho e supa hore ‘melaelloa kamor’a hore a bone kharebe ea hae e phehile khang le mofu o ile a phamola thipa ho eena Mare ‘me a mo nyekenya ka eona a nt’o mo siea a rapalletse fatše a balehela moo a lulang.
Sepolesa se ile sa tsebisoa ‘me sa sala morao mophula oa mali, eaba se qhautsa ‘melaelloa ntlong ea hae. Mapolesa a fumane ‘melaelloa a nkile basekomo e tletseng metsi a mali ‘me le liphahlo tsa hae li le mali.
Sebuelli sa sepolesa, Sergeant Sifiso Gwala, o re nakong eo mapolesa a ntseng a hloma ‘melaelloa lipotso, o ile a leka ho tšola tlhako morong eaba mapolesa a mo lelekisa a mo qhautsa hape. O tla hlaha khotla haufi.
Moahisani oa mofu, Nombuyiselo Mofokeng o re ba khotsofetse ha ‘melaelloa a tšoeroe. Nombuyiselo o re mofu o ne a fihli sebakeng seo ngoahola a tlo batla mosebetsi ho hlaha Lesotho. “Leha ho le joalo, re soabile hoba mofu o siea mosali oa hae e le mokhachane ea likhoeli li supileng.” Oa hlalosa.
Ho sa le joalo, ho na le mabare-bare a hore mofu, ‘melaeloa le kharebe le bona ba tsoa Lesotho.
