MAKOBOTATA A TŠOARA SEHOPOTSO SA MOFU LEHANA
La 25 Phupu 2023
Mokha oa Kobotata ea Basotho (All Basotho Convention – ABC) maobane holong ea Lehakoe, Maseru, o tšoere tšebeletso ea sehopotso sa bophelo ba mofu ntate Habofanoe Sixus Lehana. Mofu o timetse ka la 9 Phupu 2023.
Mofu o hlahile ka la 13 Tlhakubele 1960, Ha Lehana, Berea.
Mofu e bile mokhethoa oa ABC oa mehleng lebatooeng la Khafung. Ho feta mona e bile letona makaleng a fapaneng; la Puso ea Libaka le Borena, Khoebo, Mesebetsi e Meholo le Ntlafatso ea Khoebo hammoho le Toka le Molao oa Motheo lipakeng tsa selemo sa 2015 le 2020.
Mofu Lehana o tlalehoa ke moholoane oa hae monghali Mahlakajoe Lehana a timetse ka lebaka la lefu la letšoeea (asthma). A bua lebitsong la mooki monghali Lehana o re mofu o ile a oela ka Sontaha sa la 9 Phupu 2023. Kamora moo o ile a potlakisetsoa sepetlele sa Sehopotso sa mofumahali ‘Mamohato moo a ileng a felloa ke bophelo.
Mahlakajoe Lehana
O bontšitse hore mofu o nkile lilemo tse ngata a phela le lefu lena ‘me ba ne ba nka e le ngaka ea lona kaha a ne a khona ho thusa bakuli ba bang.
“Khetlong lena e ile ea batla e mo qhekella. Ha e le ka ka 9 khoeling eona ena, ho ne ho bata haholo Sontaha seno. O ne a le hahae a orile mollo oa setofo. Empa e ile eare ka hora ea leshome mohatšae o ile a nyoloha ho ea mo lokisetsa.
“Kea kholoa ho lokisa hantle, akere morao tjee ho’a bata re sebelisa electric blankets tsena hangata.”
“Pele a fihla mono o ile a mo hoelehetsa ka lentsoe le phefa a re ‘Malefela’ e leng mohatsa oa hae. Eare ha a utloa a khutla ka potlako ho utloa hore na ntate o reng. Empa eitse ha a hlaha o ile a fumana a tšoere peipi ea hae ka letsoho le letšehali. Eaba o phahamisa mahlo feela letsoho la hae la liha peipi, a inamisa hlooho. Ba ile ba leka ho etsa lithuso tsa pele empa hoa bonahala hore bothata bo teng.” Monghali Lehana o hlalosa joalo.
Libui tse ‘maloa ho hlaha mokheng oa Kobotata li hlalositse Lehana a siile sekheo se seholo Kobotateng. Ba phafa makhabane a hae kholisong ea mokha ona.
Moetapele oa ABC, Nkaku Kabi o tekile ka moo a tsebileng mofu. “Ntate Lehana o ne a rata temo haholo. Hohle moo a neng a le teng o ne a lula a nyenyeletsa ba bang hore ‘hela ba heso ha re kopaneng ho bona hore re thusa naha ea Lesotho ka litaba tsa temo.’ Re ne re mo chakela le koana Clocolan polasing ea hae re kalimana ka liramo.” O li beha joalo.
Ho feta mona, Kabi o hlalositse hore o tsebile mofu moo ba neng ba iketla ba phomola teng Maseru West. O bontšitse hore ke hona moo ba neng ba hloa mofu setha ho mamela litaba tsa hae tse ba ahang.
“Tsatsing la kajeno re tšelisa lelapa ka tieo sehopotsong sena hore Morena Molimo o se a phahamisitse letsoho la hae. Joalokaha ntate oa hae a cho, tebello e ne e le hore ke eena ea tla boloka ntate oa hae empa mophethahatsi ke morena Molimo.
Lijone Mpotjoane
Nkaku Kabi, moetapele oa ABC
Mofu o siea batsoali, mohatsa, bara ba babeli le bana ba bo ba supileng
“Litaba tseo re li buang kajeno ke tseo re reng lelapa la Lehana le bososele le tlale thabo hore Lehana o phetse bophelo ba hae lefatšeng le ka koano.” Kabi o tšelisa lelapa joalo.
Ho sa le joalo, Letona la Machabeng, Lejone Mpotjoane o bile teng ho fana ka matšeliso ho lelapa ekasitana le Makobotata. O ile a bontša hore bophelo le lefu ke tsa Jehova ‘me ha ho na motho ea nang le taolo holim’a tsona.
Ha a fana ka mantsoe a khothatso ho lelapa o itse; “Re le basotho re tloaetse hore lefu ke ngoetsi ea malapa ‘ohle empa ha u se u e nahanisa ka botebo, re tla lemoha hore ngoetsi e tla ka hare ho lelapa ka boikhethelo empa lefu le tla ka hare ho malapa ‘ohle ka khetho ea Molimo eseng ea motho. Kahona, ho ea nepahala hore ke re ho lelapa, re tle re ananele thato ena ea Molimo joalokaha re rapela re re thato ea hae e phethehe lefatšeng joalokaha e phethoa leholimong.” Mpotjoane o fera matšeliso a hae.
Mofu o tla bolokoa ka lepato la semmuso Labohlano, Ha Lehana, Mahlatsa, Berea ka Labohlano la 28 Phupu 2023. Lits’ebeletso li tla qala ka hora ea borobeli hoseng.
