LDF E AMOHELA BAELETSI BA MASOLE HO HLAHA MACHABENG
La 16 Phupu 2023
Liahelong tsa sesole Ha Ratjomose, Maseru kajeno ho bile le tšebeletso ea kamohelo ea liofisiri tseo e leng baeletsi ba sesole (Military Attachés and Military Advisors) ho tsoa machabeng.
Masole ana a hlaha linaheng tse fapaneng tse nang le likamano tsa selipolomati le Lesotho. Liofisiri li hlaha linaheng tse latelang: Angola, Botswana, Cameroon, Federal Republic of Germany, Malawi, Namibia, Republic of Niger, United Republic of Tanzania, Republic of Turkey le Republic of Zambia.
Brigadier General S. Kondowe (Malawi) o fana ka puo lebitsong la liofisiri tsa baeti
Mabitso a liofisiri ke Brigadier General Jose Vierra Dias Paulino do Cormo (Angola), Colonel Mompoloki Nkgapha (Botswana), Brigadier General S. Kondowe (Malawi) Captain (Navy), A.N. Hainbola (Namibia) Captain (Navy) Thomas Burcheta, (Germany), Col. Jonas Nyambe (Cameroon) le ba bang. Bona ba ne ba felehelitsoe ke Colonel Matomane oa Afrika Boroa.
Molaoli oa sesole sa Lesotho, Leutenant General, Mojalefa Letsoela, o amohetse masole ao ka ho a abela mangolo a tumello (accrediation certificates) ho tla sebetsa Lesotho. O bile a ba fa limpho.
Major General ‘Matumelo Ramoqopo, e le mookameli lefapheng la khiro le tsamaiso sesoleng sa Lesotho o ile a etsa puo ea kamohelo ea liofisiri tsohle tse amoheloang kajeno.
Major General ‘Matumelo Ramoqopo
“Phutheho ea mofuta ona e ea hlokahala kaha e fa baeletsi ba sesole monyetla oa ho kopana, ho buisana le ho arolelana litsebo. Ho entsoe ka boomo hore kamohelo ea lona e nepane le mokete o moholo oa tsoalo ea Motlotlehi hlooho ea naha o tlil’o tšoaroa hosane ka la 17 Phupu 2023.
“Seabo sa lona se bohlokoa haholo ntlheng ea tšebelisano mahareng a linaha tsa rona. Lebitsong la bolaoli, le amohelehile, ‘me ke le lakaletsa mahlohonolo tšebetsong ea lona kahara naha ena.” Ramoqopo o phethela joalo.
Ho sa le joalo, e mong oa baeletsi ba sesole ho tsoa sesoleng sa Malawi, Brigadier General S. Kondowe o ile a etsa puo lebitsong la liofisiri tse amoheloang. A re ba leboha ha LDF e ba amohetse ho tla sebetsa le bona. A bontša hore ba fumane kamohelo e mofuthu ha ba kena Lesotho.
Ho koala tšebeletso ena, Lieutenant General Letsoela o ile a etsa puo. A tsebisa masole a baeti hore a tsebe hore ke karolo ea LDF.
“Re sirelelitse sechaba se se kaalo ka 2 milone. Naha ea rona e likanyelitsoe ke Afrika Boroa. Bonnete re iphelela ka khotso le bona; re metsoalle.” Ke eena a simolla puo.
Ha a tsoela pele, o itse hajoale LDF e rometse masole Cabo Delgado, Mozambique ho ea loantša borabele naheng eo.
“Ke thabile haholo ho le amohela letsatsing lena le lelekellang mokete oa tsoalo ea Motlotlehi hosane. Kahona, le tlo ba le monyetla oa ho ba haufi le Motlotlehi hosane. Le eena o’a tseba ka boteng ba lona ‘me o thabile haholo. Re motlotlo ho ba le lona kahara naha ea rona.” Ke Molaoli a amohela baeti.
Boha linepe ha liofisiri li amohela mangolo
Lit. Gen. Letsoela o fana ka mangolo a kamohelo ho liofisiri [Image - LDF/Facebook]
Lit. Gen. Letsoela o fana ka mangolo a kamohelo ho liofisiri [Image - LDF/Facebook]
Lit. Gen. Letsoela o fana ka mangolo a kamohelo ho liofisiri [Image - LDF/Facebook]
Lit. Gen. Letsoela o fana ka mangolo a kamohelo ho liofisiri [Image - LDF/Facebook]
Lit. Gen. Letsoela o fana ka mangolo a kamohelo ho liofisiri [Image - LDF/Facebook]
Lit. Gen. Letsoela o fana ka mangolo a kamohelo ho liofisiri [Image - LDF/Facebook]
Lit. Gen. Letsoela o fana ka mangolo a kamohelo ho liofisiri [Image - LDF/Facebook]
O bile a hlalosa hore baeti ke masole ‘me LDF le bona ba tlo shebela ‘moho tšebetsong ea sesole kaha bao ke baemeli ba sesole sa linaha tsa bona. A re ho bohlokoa ho arolelana leseli ekasitana le ho ba le menyetla ea ho fumana koetliso naheng ka ‘ngoe. Letsoela o itse ho na le liqholotso tsa maemo a ntseng nyehla a tšireletso hloahloeng e ka boroa ea tikoloho ea Afrika. A re baemeli bana ke litsebi litabeng tsa tšireletso ‘me o’a tšepa hore ba tla thusetsa ka mahlale ho hlola liqholotso tsena.
Ho sa le joalo Raliphatlalatso oa LDF, Leutenant Colonel Sakeng Lekola puisanong le Leihlo la Basotho o hlalositse hore kamohelo ea liofisiri tsena ke tatelliso ea matlo a tsona a boemeli kaha a mang a matlo a Pretoria Afrika Boroa. Lekola o hlalositse hape hore liofisiri tsena ke baemeli ba linaha tsa bobona litabeng tsa tšireletso ‘me a re ba tla ba le monyetla oa ho ba moketeng oa Motlotlehi hosane.
