SHE-HIVE E TSEKA TOKA POLAONG EA DIAHO
Ka Moipone Makhemeng
La 12 Phupu 2023
Mokhatlo o sebetsanang le ho fana ka tšehetso ea tlhabollo ho mahlatsipa a tlhekefetso ea malapeng le ba anngoeng ke eona, She-Hive Association Lesotho, o ngolletse mookameli oa sepolesa, Monghali Holomo Molibeli lengolo mabapi le ho sisintha hoa nyeoe ea polao ea mofu ‘Mahlao Diaho, oa Khubetsoana, Berea ea ileng a fenethoa ka selemo sa 2020.
Kamor’a polao, mohlankana oa hae Moeti Thipane o ile a belaelloa e le eena ‘molai. Ke moo sepolesa se neng se mo tšoare a nt’o hlahisoa khotla. Pelaelo ke hore moqosuoa o ile a khama mofu hofihlela a nehela moea.
Lengolo la SHE-HIVE la la 24 Motšeanong 2023 le batla hore mookameli oa sepolesa a hlalose khatelo pele nyeoeng ena. Lengolo le boetse le senotse hore lelapa la bo-mofu ha le e-s’o tsebisoe ka tema e khathiloeng ho tloha 2020.
“Re u ngolla lengolo lena ho batla khatelo-pele e fihletsoeng nyeoeng ena. ‘Mahlao Diaho o ile a bolaoa, ‘me pelaelo ke hore o fenethiloe ke mohlankana oa hae, Moeti Thipane empa a tsoa chankaneng kamora ho lokolloa ka beile.
“Mok’homishenara Molibeli, tlhekefetso khahlanong le basali le lipolao tsa bona naheng ea Lesotho e fihlile maemong a hlobaetsang. Setsi sa heno se tšepetsoe ho phethahatsa molao le ho beha litloli tsa molao makhotleng. Ke ka kutloisiso ena lebitsong la lelapa la Diaho re lakatsang ho tseba khatelo-pele nyeoeng ena.
“Lilemo tse tharo li kolumetse joale ho se nko ho tsoa lemina. Mofu o lahlehetsoe ke bophelo matsohong a motho ea neng a re oa mo rata.
“Re na le mohopolo oa hore tiihiso ea toka e tšoana le ho amoha toka.” Le baleha joalo, lengolo le tekenetsoeng ke mookameli ‘Mamakhethe Phomane.
‘Mamakhethe Phomane, Mookameli oa She-Hive (Foto – Mamakhethe Phomane-Facebook
Ho sa le joalo, Leihlo la Basotho le batlile lehlakore la sepolesa mabapi le lengolo lena. Motlatsi oa raliphatlalatso tsa sepolesa, Inspector ‘Mareabetsoe Mofoka o hlalositse hore lengolo le joalo ha le e-s’o fihli ofising ea habo ea liphatlalatso. A re mohlomong le teng ofising ea mookameli.
Leha ho le joalo o itse: “Ntho eo ke e tsebang ke hore linyeoe ha re qala re li beha makhotleng ha re sa na taolo holim’a tsona. Ea hore na li’a kena kapa ha li kene ha re na le lentsoe feela.”
“Ehlile ha re behile nyoe mono ke ea makhotla. Ke ka hona leha re hana hore moqosuoa a fuoe beile empa lekhotla le ka fana ka eona ha le sa kholisehe ke mabaka a sepolesa.” Mofoka o kobella litaba tsa hae joalo.
