MOKHOTHU O HANA ‘POSTMORTEM’ EA MAPOLESA
Ka Moipone Makhemeng
La 5 Phupu 2023
Moetapele oa Democratic Congress (DC), Mohlomphehi Mathibeli Mokhothu kajeno o bile Mafeteng ho ea hloela lelapa la setho sa DC ebile e le sebini sa Potoana, mofu Refiloe Makatsa, ea ileng a timela mafelo a beke. Pelaelo ke hore o bolauoe ke setho sa sepolesa se sebetsang hona Mafeteng.
Mokhothu o ile a tšetlehela baqolotsi ba litaba puo a le lapeng ho fana ka tlhaloso ea lelapa ka se jeleng mofu: “Moqebelo (La 1 Phupu 2023) ho ne ho na le konsarete ea litho tsa DC mona Mafeteng. Mofu o tlohile mona lapeng a ea moketeng oa lipina empa a khutlela lapeng hape.
“Ha a lokela ho tsoa a khutlela konsareteng ka koloi ea hae o fumane likoloi li se li koetse keiti ea hae. O ile a omana ha a fumana a koalletsoe tsela. Ba ile ba qoaketsana le lepolesa la motebo oa hona Mafeteng mona ‘me ba qetelletse ba betana ba tšoarana ka matsoho. Ke moo lepolesa le ileng la ntša thipa empa khabareng thipa ea tsoa matsohong a oa ‘muso eaba o hula sethunya. Ntate Makatsa o lekile ho potela mono a baleha empa lepolesa le ile la lokolla sethunya; la mo thunya.” Mokhothu o hlalosa joalo.
Litho tsa DC li ile tsa khobokana lapeng la mofu
“Motho enoa h’a sa oele, sepolesa se ile sa mo phutha e le hona lelapa le ntseng le sheba hore le ka mo fumanela thuso joang. Motho enoa o timelletse matsohong a sepolesa. Ke fumane hore postmortem (liteko-tsa-kamora-lefu) e entsoe ke mapolesa ho se karolo ea lelapa, joale ba fana ka tlhaloso ea lehlakore la bona ba le bang. Ke kopile lelapa hore ha li le joalo li tla ja mabele.
“Ke buile le ntate Lets’aba hore ba sebetse le akhente Mda, postmortem ena ha re e amohele hoba mapolesa a tla pata mok’hoba; e ka mpa ea phetoa ea qaloa qalong. Akhente ke hore e potlake e qhale hlenhlenyane ena, ha re tlo etsetsoa postmortem ke babelaelloa, re ke ke ra lumela. ” Ke Mokhothu eo.
Moetapele oa Popular Front for Democracy (PFD) Adv. Lekhetho Rakuoane o ne a felehelitse monghali Mokhothu
“Ntlha e ‘ngoe ke hore lepolesa lena le belaelloang le ntse le theohela motebong mona moo mapaki a ntseng a bokelloa hona teng. Matsatsi a mahlano motho enoa o ntse a theohela kamora ketso ena.” Mokhothu o li beha joalo ‘me a boela a ts’elisa lelapa le oeleng ka phatla hammoho le Mapotoana a lebatooa la Mafeteng.
Ho sa le joalo, ‘Marelebohile Ralekeno lebitsong la lelapa o hlalositse litaba joana: “Postmortem e fihlile kajeno ho hlaha sepoleseng feela e entsoe litho tsa lelapa li le sieo. Haeba feela re ka kopa lithuso ka lefu lena ebe re fumana bothata, Matelile e tla ipheta. Re bohloko haholo ka lefu la ngoana rona.” O rialo a hlokofetse.
Ho ea ka tlaleho ea mookameli oa sepolesa sa Mafeteng, Senior Superintendent (SSP) Leabua Shale, ha se ‘nete hore lelapa ha e ea ba karolo ha ho etsoa postmortem ekasitana le hore ‘melaelloa o ntse a le mosebetsing.
“Re sebelitse le lelapa hofihlela qetellong. Lelapa le ile la hlalosa hore ho na le setho sa lona se teng Maseru seo re tla sebetsa le sona ho etsa postmortem. Maobane re ile Maseru ho ea e etsa ’me re fetse ra kopana le sona setho seo sa lelapa ebile ntate a tsamaea le mofumahali oa hae.
“Eena o ile a fumana cause of death hang ha ho qetuoe. Ha rona re sa emetse sephetho. Ha e le mona lelapa le cho tjena, ke utloa ke tsieloa.” Shale o rialo a bolella moqolotsi oa Leihlo la Basotho le ba bang, Mafeteng kajeno.
Ha a li thetha, Shale o supile hore ‘melaelloa o ntse a sa theohele mosebetsing kaha le eena a na le maqeba. A bontša hore h’a behelloa ka thoko ho mosebetsi semolao empa leha ho ne ho se joalo litabeng tsa mofuta ona o ne a loketse ho behelloa ka thoko ho mosebetsi.
“Hajoale lipatlisiso li phethetsoe re emetse Mochochisi e Moholo hore a fane ka tokollo ea hore ‘melaelloa a qosoe.” SSP Shale o phethela joalo.
