SECHABA SE HLOKOMELISOA HO SE PALAME KOLOI TSE SENG MOLAONG
La 19 Phuptjane 2023
Lekala la Mesebetsi ea Sechaba le Lipalangoang le lokollotse tlhokomeliso e bohale kajeno ho khalema sechaba ho khaotsa ho palama makoloi a se nang tumello ea ho nka baeti kahara naha.
Ho ea ka polelo ena, sechaba se lokela ho khaotsa ho palama makoloi a letsetsoang kapa a fumanoang ho marang-rang kapa a fumanoang tseleng, a tsejoang ka hore ke Catch-A-Ride.
“Lekala le ipiletsa ke hona ho Basotho ba ntseng ba etsa seo ho emisa hang-hang hoba seo se ka ba kenya tlokotsing.” E rialo polelo e tekenetsoeng ke raliphatlalatso oa lekala, Ntumeleng Ntšekhe.
Lekala le hopotsa sechaba hore koloi ea baeti ho ea ka molao, e lokela ho ba le tse latelang: Polomiti ea ho nka baeti; C, D kapa F Permit (cross border permit), nomoro-polata e sootho e nang le lipalo tse peli mohlala – A 01 BBC. Ho feta mona, koloing e nkang baeti ka molao e na le Khutlo-Tharo (Triangle) e manamisitsoeng fenstereng e ka pele ho koloi (windscreen).
Ntlha e ’ngoe ke hore e lokela e-be le tokomane ea lenane la baeti leo koloi e lokelang ho le nka (certificate of fitness). Sechaba se ka bona hape ka boto e bontšang moo koloing e eang teng ’me likoloi tsohle li tšoaetsoe boemelo (Bus/Taxi ranks).
Sechaba se hlokomelisoa ke hona ho palama likoloi tse nang le tse boletsoeng. Lekala le supa hore likoloi tsohle tse hlokang lipehelo tsena e bile li sebelisa mekhoa e seng molaong ea ho batla baeti, ha se tse sebetsang ka molao.
