HO QHOMA KHANG E NCHA MAPOLESENG
Ka motlalehi oa rona
La 14 Phuptjane 2023
Sebokeng sa Mokhatlo oa Mapolesa a Lesotho (Lesotho Police Staff Association – LEPOSA) se bileng Thaba-Bosiu, mookameli oa sepolesa, monghali Holomo Molibeli o ile a itlama hore o bopile khotso le LEPOSA kamora likharuru tsa nako e telele lipakeng tsa ofisi ea hae le komiti ea LEPOSA.
Nakong ea litšokelano, Molibeli o bile a nka qeto ea ho fanyeha tšebetso ea mokhatlo empa a e fanyolla hamorao. Nakong ena ho bile bolutu ha mokhatlo o isana holimo le tlaase ekasitana le makhotleng.
Ho sa le joalo, ho qhomme qaka e ncha lipakeng tsa bobeli bona kaha Mongoli-Kakaretso oa LEPOSA, Inspector ‘Makatleho Mphetho o ngolletse mookameli oa sepolesa lengolo, a re a hule tumellano eo a e tekenetseng le mokhatlo oa inshorense – LNIG Hollard.
Ho shebahala mookameli oa sepolesa a tekenne tumellano (Memorandum of Understanding – MOU) le k’hamphani ea inshorense – LNIG Hollard ho tsamaisa lichelete tsa mokhatlo oa lepato oa mapolesa.
Lengolo le baleha ka tsela ena: “Re batla u hule tumellano eo u e entseng le LNIG Hollard.
“Re lakatsa ho hlakisa ka ho totobala hore sebokeng sa LEPOSA se neng se tšoaretsoe Thaba-Bosiu, hara liqeto tsa seboka mabapi le mokhatlo oa lepato oa mapolesa ho lumellanoe hore ha ho moo lichelete tsa mokhatlo ho tla buisanoa ka tsona hore li ka lebisoa sebakeng sefe kapa sefe ntle le litumellano le LEPOSA.
‘Makatleho Mphetho – Mongoli-Kakaretso oa LEPOSA (Image supplied)
“Re tšoenyehile hoba honajoale ha ho litlaleho tsa lichelete tse hlahlobuoeng tseo re kileng ra li fumana.
“Ka mabaka a tšetlehiloeng ka holimo, re u eletsa ho hula tumellano lipakeng tsa ofisi ea hau le LNIG Hollard hang-hang nakong ea lihora tse 24. Hlokomela hore haeba u ka hloleha ho etsa joalo, re tlo hloka boikhethelo empa ho ea batla thuso makhotleng a molao.” Lengolo la LEPOSA le ngotsoeng kajeno le rialo.
Ho sa le joalo, bookameli ba sepolesa bo re bo tekenne tumellano le LNIG Hollard e le ho tla thusa ho ntlafatsa lichelete tse fumanoang ke ba malapa mokhatlong ona. Sena ke ho ea ka lengolo le potolohang la bookameli le bileng le tsebisang baokameli ba metebo ea sepolesa hore LNIG Hollard e tla potoloha naha ka bophara ho tsebisa mapolesa litaba tsena.
