MATEKANE O AMOHELA SETSI SA PHEHLO EA MOTLAKASE OA LETSATSI
La 12 Phuptjane 2023
Tona-Kholo Ntsokoane Sam Matekane kajeno o bile tšebeletsong ea ho amohela setsi sa phehlo ea motlakase oa letsatsi, Ha Ramarothole, Mafeteng.
Letona la Lihloliloeng, Mohlomi Moleko o itse naha e hloka kakaretso ea motlakase oa boima ba 200 megawatts. A re mokhahlelo oa pele o nehelanoang kajeno o tlo fehla 30 megawatts ’me a re mokhahlelo oa bobeli o tla fehla 50 megawatts athe ha setsi se phethetsoe se tla fehla 80 megawatts ka kakaretso.
O supile hore setsi sa ’Muela se fehla 72 megawatts leha se hloka ho lokisoa hoba mochini o mong esale o shoa o neng o fehla 24 megawatts.
Matekane o bula setsi ka molao
Moemeli oa mokonteraka o ahileng setsi sena, SINOMA Consortium o ile a hlalosa hore morero oa phehlo ea motlakase oa Ha Ramarothole, Mafeteng ke o moholo ka ho fetisisa oa letsatsi naheng ea Lesotho kaha o tlo fehla 80 megawatts ha se felile.
A supa hore ba sebelitse tlas’a liqholotso tsa tiehiso e bakiloeng ke koluoa ea Covid-19 kaha e ile ea liehisa ho tlisoa hoa thepa ho hlaha China.
A re morero o tlo thusa Basotho ka phepelo e tsitsitseng ea motlakase ekasitana le ho bula menyetla ea mosebersi ho Basotho.
“Morero ona o tsoetsoe ke phutheho e bileng Johannesburg ka 2015 ea tšebelisano-’moho ea China le Afrika. Ho ile hoa phetholoa lekote ka Tšitoe 2020 ’me ka Tlhakubele 2021 mosebetsi oa thakhoha moo ho ileng hoa hlaha mesebetsi e kaalo ka 500 nakong ea khaho.” Ke moemeli oa mokonteraka eo.
Selibe Mochoboroane o kopa sechaba sa Mafeteng ho se bake ts’enyo morerong ona
Moifo oa mokonteraka o itse o tla tsoela-pele ho lisa le ho lokisa setsi sena nako ea lilemo tse tharo tse tlang.
Ka lehlakoreng le leng, morena oa Ha Ramarothole, Konyana Ramarothele o re ba ananela ntlafatso e ahiloeng sekhutlong sa Likhoele. O ile a re esale ba sireletsa setsi seo ho tloha qalong ‘me a ts’episa hore ba tla lula ba se sireletsa hofihlela qetellong. A leboha ‘muso kaha matšeliso ho beng ba masimo, moo matlapa a letsatsi a lutseng teng, a tsamaile ka thello ho se likhang tsa letho. Ramarothole o ile a lebohela sechaba sa habo ka hore morero oo o tlisitse phetoho kahara motse.
A supa hore tšireletso e matlafetse haholo kaha ho na le masole a fanang ka tšireletso moo. Feela o ile a meketsa hore kaha morero o amme masimo a mangata, o bona tlala e tobileng sechaba.
Kahona a ipiletsa ho ba ’muso ho tla ka maoala a tla kenyetsa sechaba mokhoa oa boipheliso kaha a itse chelete ea matšeliso sechaba se e fumane empa e se e felile.
Mookameli oa mekonteraka
Ho sa le joalo, mokhethoa oa Thabana-Morena, Selibe Mochoboroane o ile a lebohela sechaba sa habo ka morero ona, ’me a ipiletsa ho lisinyi ho khaotsa ho baka tšenyo sebakeng seo. O ile a kopa bookameli ba sesole ho se hule sesole moo.
Morena oa Sehlooho oa Likhoele le eena o ile a re o aka mosebetsi o entsoeng ke ’muso oa China le oa Lesotho empa a ipiletsa ho sechaba sa Ha Ramarothole ho khaotsa botoutu ba ho baka tšenyo sebakeng sa morero.
Kamora ho amohela setsi semmuso, tona-kholo Matekane o ile a lebohela sechaba, a re motlakase ona o tlo tlatseletsa phehlong ea motlakase oa naha ’me a re takatso ea hae ke hore ho fehloe motlakase o tla anela naha le ho rekisetsa linaha tse ling. Matekane o ile a tšepisa hore mafelong a Tšitoe 2024 mokhahlelo oa bobeli oa khaho ea setsi sena o tla phetheloa e leng o tlo fehla 50 megawatts ho eketsa ho 30 megawatts ho etsa kakaretso ea 80 megawatts.
“Ke kopa thepa ena le e baballe molemong oa lona le sechaba sa Basotho ka kakaretso.” Matekane o laile sechaba sa Ha Marothole joalo.
