VODACOM, UNICEF LI PHALLELA SEKOLO
Ka Moipone Makhemeng
La 6 Motšeanong 2023
Vodacon Lesotho Foundation (VLF) le Mokhatlo oa Lefatše oa Lithuso Baneng (UNICEF) maobane e nehelane ka mpho ea M600 000 ho sekolo sa bana ba nang le bokooa ba pono, Resource Centre for the Blind, Maseru. VLF le UNICEF li nyehetse M300 000 mokhatlo ka mong hore kakaretso ea mpho e-be M600 000.
Mosuoe-hlooho oa sekolo seo, mofumahali ’Mamoliehi Tamako o fane ka nalane ea sekolo a re e se e le lilemo tse mashome a mahlano (50) sekolo se le thehiloe ‘me a re ke sekolo se amohelang bana ba nang le bokooa ba pono.
Ho ea ka tlhaloso ea hae, mathomong a sona sepheo e ne e le ho amohela bana ba mashome a mararo feela empa hajoale ke bana ba mashome tšeletseng le metso e meli (72) kaofela ba amohetsoeng.
’Mamoliehi Tamako, mosuoe-hlooho oa Resource Centre for the Blind
Ha a tsoela-pele o hlalositse hore ba amohela bana ho tloha ka sehlopha sa pele ho isa ho sa bosupa. O bontša hore ho tloha ho sa boraro ba kena ka St. Bernadette kamoo ba ithutang ho bala le ba bonang ‘me bona ba sebelisa lithusa-thuto e leng mechini ea braille.
Mofumahali Tamako o bontšitse hore har’a liqholotso tseo ba tobaneng le tsona ke tlhokahalo ea litichere kaha hajoale e le litichere tse tšeletseng feela sekolong sena. A re mosebetsi ha o tsamaee ka thello. O re sena se baka tšenyo ea nako kaha bana ba kenang St. Bernadette ha ba ngola ba isa lithuto tsa bona pele ka ho bona ebe hona joale ba tla fetolela tseo ho mongolo oa braille.
Ho feta mona o bontšitse qholotso e ’ngoe e le tlhokahalo ea bolulo joalokaha a se a hlalositse hore lenane le eketsehile. Ntle ho moo matlo a ile a hlalosoa a se a le tlokotsing a bile a peperane a ka ’na oela neng kapa neng.
Mofumahali Tamako o thoholelitse Lekala la Ntšetso-pele ka tšehetso eo e sa leng ba e fa sekolo.
Ha a phethela o fane ka likatleho; a re hofihlela joale ba na le baithuti ba fetang 20 ba ileng ba finyella boemong ba junifesithi.
A re baithuti ba mona ba ipabola haholo mabelong ‘me ba emela Lesotho lipapaling tse joalo. O bontšitse hore ba sa tsoa khutla Malawi selemo se fetileng ’me ba tlile le likhau.
Monghali Kimanzi Mthendai e le motlatsi oa moemeli oa UNICEF Lesotho o ile a fana ka puo; a bontša hore bana ba nang le bokooa Lesotho ba tobane le liqholotso tse ngata tse kenyellelitseng tlhokahalo e matlafetseng ea thuto.
Kimanzi Mthendai, motlatsi oa moemeli oa UNICEF Lesotho
A supa hore lipalo-palo ho tloha 2018 li bontša bana ba joalo ba le ka ntle ho sekolo. Ho feta mona, o re qholotso eo ba tobaneng le eona ke khaello ea phepo e nepahetseng.
O boetse a re bana ba nang le bokooa ba fihlela bokhoni bo fokolang ba ho bala ke ka hona ho nang le tlhokahalo ea hore ba abeloe lisebelisoa tsa ho bala.
Molula-setulo oa boto ea Vodacom Lesotho, monghali John Matlosa o hlalositse hore sena ke selemo sa bobeli ba iponahatsa sekolong sena. O bontšitse hore selemo se fetileng ba ile ba fana ka M650 000 ‘me chelete ena e tla sebelisoa mabakeng a sekolo joaloka theko ea libuka.
ohn Matlosa, molula-setulo oa boto ea Vodacom Lesotho
Ho feta mona, o thoholelitse botsamaisi ba sekolo ka tlhokomelo e ntle ea bana. O bile a leboha le ho ananela tšebelisano-’moho e ntle. Ha a phethela o ipilelitse ho batho ho tlatsetsa ka moo ba ka khonang e le ho tšehetsa barutuoa.
