LESOLE LE THUNTSOE TAMENENG
Ka Moipone Makhemeng
La 18 Motšeanong 2023
Litho tse peli tsa sesole sa Lesotho li tlalehoa li ile tsa qoaketsana ntlong e ’ngoe ea mothamahane Ha Leqele, Maseru. Ea boneng ketsahalo ena ka mahlo o re kamora ho qhoelisana ka mantsoe lesole le leng le ile la thunya mphato oa lona ka bistolo.
“Batho bano ba qabane re le tameneng (tavern) mono Ha Leqele. Nakong ea qoaketsano ea bona, ke moo re ileng ra utloa sethunya se khabola, eena ha ’molaea feela o mo thuntse.” Ho rialo e mong ea boneng ka mahlo, a bile a hlalosa hore ketsahalo e bile bosiung ba la 12 Motšeanong 2023.
Ho sa le joalo koranta e buisane le mookameli oa liphatlalatso Sesoleng sa Lesotho, Lieutenant Colonel Sakeng Lekola ho fana ka lehlakore la sesole tabeng ena ’me eena o ile a araba ka tsela ena: “Ke qala ho li utloa ha ke li tsebe litaba tse joalo.” Ke Lieutenant Colonel Lekola a bua le moqolotsi ka Mantaha motšeare.
Lieutenant Colonel Sakeng Lekola [foto – Facebook]
Koranta e bile ea etsa tšalo-morao tabeng e etsahetseng Ha Leqele ho raliphatlalatso oa sepolesa Senior Superintendent Mpiti Mopeli empa mohala oa khabola feela o sa arajoe.
