BAPHATLALATSI BA TŠOARA THAPELO TŠENOLO FM
Ka Moipone Makhemeng
La 17 Motšeanonong 2023
Baqolotsi le baphatlalatsi ba litaba ba ile ba khobokana ‘moho Tšenolo FM ho etsa thapelo ekasitana le ho laeta likerese moo seboholi sa seea-le-moea, Ralikonelo Joki ea neng a tumme ka lebitso la “Leqhashasha” a oeleng teng kamora ho thunngoa ka lethala la likulo ke batho ba sa tsejoeng bosiung ba la 14 Motšeanong 2023.
Sergeant Makhalemele lebitsong la bookameli ba sepolesa o ile a tšoela ka sehlethela sa mathe ketso e mpe ena o ile a ipiletsa ho baqolotsi le baphatlalatsi ho tšoarana ka matsoho le sepolesa ho fenya litlolo tsa molao.
“Ha re ke behelleng litokelo tsa mantlha tsa litloli tsa molao ka thoko. Ke li bitsa tsa mantlha hobane litloli tsa molao ha li qeta ho etsa lintho tse mpe, se behoang kapele ke litokelo tsa hae. Ha ho mohla ho buuoang ka tsa ea entsoeng hampe kapa beng ka eena.” Sergeant Makhalemele o li beha joalo.
Mookameli oa Ts'enolo FM, Mshengu Tshabalala,
Sergeant Makhalemele
Monghali Motseki Joki, Moholoane oa mofu [Foto, Moipone Makhemeng]
Moriti o bala lentsoe la Molimo ts'ebeletsong ea thapelo
Baphatlalatsi ba khants'a mabone
Baphatlalatsi ba khants'a mabone
Ho sa le joalo, lebitsong la mokhatlo oa bophatlalatsi, Media Institute of Southern African Lesotho (MISA), mofumahali Celina Leteketa e le motlatsi oa molula-setulo o bontšitse hore ha motho a bolaea mophatlalatsi a le mong oa litaba o tima likete tsa batho litaba.
O ile a tsoela-pele ho bontša hore litaba tseo, li molemong oa sechaba ho ba thusa ho etsa liqeto tse nepahetseng tsa maphelo a bona. Ho feta mona, Leteketa o ipilelitse hore mapolesa a phuthe lithunya tse seng molaong, kaha sethunya se bonahala e le kholumo-lumo e qetang sechaba sa Basotho.
O ile a supa hore sena ha ba se bui feela hobane e le Leqhashasha ea oeleng empa ba bona letsatsi ka letsatsi Basotho ba timela matsohong a bo-rasethunya.
Ho sa le joalo, moena oa mofu monghali Motseki Joki o hlalositse, o behile kapele ho sepolesa hore batho ba thuntseng moena oa hae ke batho ba tsebang ho sebelisa sethunya. ‘Me polelo ea hae ebile khutšoane kaha a kentse boipiletso hore ebe ke lekhetlo la ho qetela ho ba le mophatlalatsi ea bolaoang joaloka Leqhashasha.
Lebitsong la seea-le-moea, mookameli monghali Mshengu Tshabalala ha a hlalosa tsa ketsahalo ea letsatsi leo mofu a timetseng ka lona, o itse ka 9:30pm ke nako eo mofu a tsoang holim’a khaso. A re ho tloaelehileng ke hore ea keneng lenaneong a se tsoe e mong a e-s’o fihle empa letsatsing leo, mofu o ile a etsa ho sa tloaelehang a tsoa moruti Maila a e-s’o kene kaha e le eena ea neng a lokela ho kena kamor’a hae.
Ha a tsoela-pele ka tlhaloso, o re mofu o ile a kopana le moruti Maila ka ntle ‘me ba shapana ka khanya tsa makoloi e le mokhoa oa tumeliso. Ke moo mofu hore a fihle hekeng ea jarete sethunya se ileng sa khabola.
Tshabalala o re sesole ka lehlohonolo ho ne ho na le sesole se neng se le haufi ‘me sa atleha ho iponahatsa kapele empa ntoa e ile ea hlola mofu, a felloa ke bophelo hona moo, ha bo-rasethunya ba ile ba baleha.
