POLELO EA ‘MUSO E PETLENYANG KHINO EA MOTSAMAO
Leihlo la Basotho
La 15 Mots’eanong 2023
Matona a mabeli a ‘muso oa Lesotho, bahlomphehi Letona la Likhokahanyo, Thekenoloji, Mahlale le Boqapi , Nthati Moorosi le Lebona Lephema, letona Puso ea Libaka le Borena, Lekala la Lehae le Sepolesa, ba hlahelletse thelefishining ea naha (LTV) shoalaneng ena ka lefu la seboholi se thuntsoeng le ho bolaoa bosiu ba maobane, mofu Ralikonelo ‘Leqhashasha’ Joki ea ileng a fenthoa ka lithunya hang ha a tsoa keiting ea Ts’enolo FM moo a neng a sebetsa.
Letona Moorosi o ts’oetse ketso ena ka sehlethela sa mathe ‘me letona la sepolesa lona le balile polelo ho tsebisa sechaba hore ho tloha ka khitla motsamao oa sechaba o tlil’o khinoa e le ho tlisa boemo ba lipolao le botlokotsebe taolong.
Lephema o itse: “Re boetse re hlaha ho lona re ts’oenyehile ke litlaleho tseo re li fuoang ke lihlooho tsa mafapha a ts’ireletso ea sechaba. Le tla hopola nakong e fetileng mohlomphehi tona-kholo o ile a khalema boemo bona ba lipolaeano empa ho bonahala bo boetse bo its’emme bora hape.
Leha ho le joalo, litsi tsa naha tsa ts’ireletso li malala-a-laotsoe ho sireletsa sechaba sa Basotho, Sechaba sa heso, re ema kapele ho lona ho le tsebisa hore e le ho tlisa boemo bona taolong mookameli oa sepolesa, a ipapisitse le khaolo ea boraro ea molao oa ts’ireletso ea naha o akaretsang oa selemo sa 1984 o hlomathisitsoeng ka selemo sa 1981 ka khaolo ea 37 (Section 3 of internal security act of 1984, as ammended) e tla qala ho kena ts’ebetsong ka Labobeli la la 16 Mots’eanong 2023 ho qala ka hora ea leshome bosiu (10pm) ho isa horeng ea bone mesong (4am).
Hona ke ho ema ka maoto ho bona hore re tlisa boemo bona bo sa jeseng litheohelang taolong. Sechaba sa heso ntumelleng hore ke fere litaba tsa ka ka ho ipiletsa ho sechaba ho nena litlolo tsena tsa molao le ho hlabela sepolesa patsana ka menyenyetsi malebana le litlolo tsa molao.
Lebitsong la ‘muso oa Motlotlehi ke nka motsotso ona ho fetisa mats’eliso ho tloha botebong ba ka le ho tloha botebong ba pelo ea ‘muso ho bohle mahlasipa le ba amehileng ke lipolao le litlhekefetso tsena tse soto. Kahona, ke re meea ea balumeli bohle ba faletseng e phomole ka khotso mohaung oa Molimo.
Khotso! Pula! Nala!
