MACHABA A BABATSA TŠEBETSO EA LMPS
Ka Moqolotsi oa rona
La 11 Motšeanong 2023
Mokhatlo oa Baokameli ba Sepolesa Afrika e ka Boroa, Southern African Regional Police Chiefs Co-operation Organisation (SARPCCO) ka kopanelo le Sepolesa sa Lesotho o bile le ‘moka oa baqolotsi ba litaba hoteleng ea Lancer’s Inn, Maseru kajeno.
Ha a teka litaba tsa mokhatlo, Mookameli oa Sepolesa sa Namibia ebile e le molula-setulo oa SARPCCO, Lieutenant General Joseph Shimweelao Shikongo o bontšitse hore mokhatlo oa bona o ntse o lokisetsa ‘moka oa khohola-koqo moo ho lebeletsoeng baokameli bohle ba sepolesa ba linaha tseo e leng litho tsa International Criminal Police Organization.
A re ‘moka o tla tšoareloa Namibia ka la 19 – 23 Phuptjane 2023. A hlalosa hore selemo le selemo mokhatlo oa itlhahloba le ho khetha komiti e ncha ea mokhatlo.
O ile a tlalehela baqolotsi hore eena o nkile lesokoana ho mookameli oa sepolesa sa Zimbabwe.
General Shikongo a hlalosa hore ba fihlile maobane koano Lesotho ka sepheo sa ho tla hlahloba tšebetso ea sepolesa sa Lesotho.
“Ke tlile le moifo oa heso ho tsoa sepoleseng sa Namibia le litho tsa kemeli ea SADC; ke bona ba ntseng ba nthusa ka mosebetsi oa ho hlahloba tšebetso ea sepolesa sa Lesotho. Haholo re sheba tšebetso ea mapolesa a lefapha la International Criminal Police Organization (Interpol) hore na ba sebetsa joang.
“Ke rata ho supa hore ke khotsofetse ke tšebetso ea mapolesa a heso a Interpol koano Maseru, empa che ho na le lintlha tse fokolang tseo re itseng ba li ntlafatse.” O hlalosa joalo.
Lieutenant General Shikongo o ile a phethela puo ea hae ka ho leboha bookameli ba sepolesa sa Lesotho le ‘muso ka kamohelo e mofuthu eo ba e fumaneng ketelong ena.
