CBL E THAKHOLA CHELETE E NCHA EA LIRANTA TSA AFRIKA BOROA
Ka Moipone Makhemeng
La 4 Motšeanong 2023
Banka e Kholo ea Lesotho (Central Bank of Lesotho – CBL) kajeno e bile le ‘moka oa baqolotsi ba litaba ho thakhola chelete e ncha ea Liranta tsa Afrika Boroa e le ea lipampiri le ea tšepe e tlang ho hlakola ea khale e bonahetseng e na le mathata ho kenyeletsa ho tlotsoa ke enke kaha e joalo ke e utsuoeng ke masholu mechining ea tobetsa Afrika Boroa.
‘Musisi oa Banka e Kholo ea Lesotho Dr. Emmanuel Maluke Letete o hlalositse hore chelete ena e ncha e se e le ha e kene tšebetsong ho tloha kajeno hang ha ‘moka o fela.
Dr. Letete ha a bua le baphatlalatsi, o hlalositse le ho lotomanya matšoao ao chelete e tla shebahala ka ‘ona. Tlhalosong ea hae o bontšitse hore chelete ea pampiri ke boleng ba R10, R20, R50, R100 le R200. A re kapele ho chelete ena kaofela ho na le setšoantšo sa mohlomphehi Nelson Mandela.
Chelete e ncha e pampiri ea Afrika Boroa
Ho feta mona, a bontša hore kamorao chebahalo ea chelete ke liphoofolo; R10 ke setšoantšo sa tšukulu, R20 ke tlou, R50 ke tau, R100 ke nare, athe R200 eona e na le nkoe. Ha a tsoela-pele o bontšitse hore chelete e ‘ngoe le e ‘ngoe ena le nomoro e ikhethileng.
Ho sa le joalo, o bontšitse hore chelete ena ha motho a e tšoara le ho e pholla; hare ho eona ho utloahala e hoasha joaloka ea Maloti. A bontša hape hore lehlakoreng le letona ho elella sekhutlong chelete e ngotsoe nomoro e kholo ea hlano e bonahalang ka hare ha motho a shebela chelete ena khanyeng. Qetellong o bontšitse hore le leng la matšoao a teng ke lipuo tse leshome le motso o mong tse fumanehang naheng ea Afrika Boroa.
Mokhahlelo oa bobeli oa chelete ke oa tšepe; oona o hlalositsoe e le chelete e bobebe haholo. Ea hlalosoa kaofela hoa eona e na le likhutlo (corners) ‘me Dr. Letete a li hlalosa e le hexagon. A beha Basotho leseling hore chelete ea Liranta tse hlano tse kopaneng (R5) ke eona feela e fapaneng le tse ling kaha eona e se na likhutlo.
Chelete e ncha ea ts’epe ea Afrika Boroa
Khabareng o bontšitse hore lichelete tsena tsa tšepe bokapele ba tsona bo bonahala ka letšoao la naha la Afrika Boroa ha bokamorao bo fapana. A supa hore tse ling li na le litlama-tlama, tse ling linonyana ha tse ling e le liphoofolo. Ntlha ea ho qetela e bile hore kaofela chelete ena ea tšepe e ngotsoe selemo sa 2023.
Qetellong o hlalositse hore ho tloha hajoale ba tla kena letšolo ho ruta sechaba ka chelete ena. A boela a bontša hore banka e tlo etsa ka matla ‘ohle hore khoeli ea Phuptjane ha e fela chelete ena ebe e tletse mechining ea chelete kahona Basotho ba se e makalle ba tsebe ke chelete e ea sebetsa kahara naha ena.
