MATEKANE O LOKISA MAEMO A THOTOBOLO
Ka Moipone Makhemeng
La 20 ‘Mesa 2023
Letona ofising ea tona-kholo, mohlomphehi Limpho Tau maobane o ile a epa pitso Ha Tšosane Maseru, ka sepheo sa ho tekela baahi likhato tse tlil’o nkoa ke ‘muso oa tona-kholo Sam Matekane ho lokisa boemo bo sithabetsang ba thotobolo kapa toti e fumaneheng moo.
Thotobolo ea Ha Ts’osane
Morena oa Ha Tšosane, ‘Mamosiuoa Tšosane ha a bua pitsong ena o supile ha ba tobane le qholotso e kholo ka thotobolo ena kaha ba na le litletlebo tse ngata tsa mafu a bakoang ke eona. A re batho ba tšoaroa ke mafu a kang Asthma le a mang e le li-tla-morao tsa monko o mobe oa toti ena ‘me ba hloka ngaka e le kannete. Leha ho le joalo, o bontšitse a na le tšepo hore ho tla ba le leano le betere mabapi le ho fenya qholotso ena.
Mohl. Motholela Ramakatsa, mokhethoa oa Majoe-a-Lits'oene
'Mamosiuoa Ts'osane, Morena oa Ha Ts'osane
Monghali Ts'itso, e mong oa baahi
Tohlang Majoro
Ho sa le joalo, Mohlomphehi Tau o totobalitse hore ke litletlebo tse ngata tse fihlileng ofising ea hae mabapi le thothobolo ea batho ba llang ka boemo ba eona bo sa jeseng litheohelang. A re ke ka hona Tona-Kholo Ntsokoane Matekane a boneng hore e le ‘muso ba etse se seng ka boemo bona kaha ebile e le motho ea ratang bohloeki.
Ha a tsoelapele o hlalositse hore ‘muso o fane ka chelete e kaalo ka limilione tse tharo (M3 milone) ho sebetsana le boemo ba toti. O bontšitse hore morero oa bona ke ho batla mochini o tla monya metsi a litšila hore a se ke a fetela majareteng a batho. Hape a re ba tlo reka linyanyatsi tse tlo felisa monko o mobe. A boela a supa h hore ba tla bona hore ho ba le taolo ea batho ba kenang ho lahla toti ‘me ba kenang ba tla latela methati e itseng.
Kahona o bontšitse hore ofisi ea habo e tla bulela likompone tse fapaneng ho tla hlahisa maoa ao ba ka a sebelisang ebile ba fana ka mehlala ea tšebetso hore e tle hloae na ba sebetsa le kompone e feng ho felisa boemo bono bo sithabetsang.
Lebitsong la baahi, monghali Tšitso o ile a etsa potso hore na ke ka pele hakae tšebetso e tlang ho qala kaha le metsi a fatše ha ba sa a noa ka ha a le litsila tse bakiloeng ke toti eno. A re motse oa bona o senyehile. ‘Me letona ha le araba le ilea hlalosa hore hang ha ba tloha moo esele ha ba kena tšebetsong.
Ho sa le joalo, Mayor oa toropo oa Maseru, Tohlang Majoro le eena o ile a ba le puo ‘me a supa hore ba bokane moo ka boemo bo bohloko kaha ho se ho shoele batho. A ipiletsa ho mohlomphehi Tau hore ba mpe ba bone e le maparamente hore melaoana eo ba e entseng ele mak’hanselara ea taba ea bohloeki le liphofolo e kene tšebetsong. Ha a tsoelapele pele o ile a tiisa holima puo ea morena moo a dupileng hore ba hlokoka lingaka ele kannete.
Ha a fera o entse kopa hore ho mpe ho sebetsehe joalokaha letona le buile hore motho ea tlang ho nka taolo la moo e tlaba ea nang le litsebo e seng ea raheloang mosebetsi oo ka se oeso.
Puisanong le baahi ba tlileng pitsong, ba bontšitse ha ba na le tšepo hore boemo bona bo tla loka. Ba re qalong ba ne ntse ba khona hore ba ka ja ba phela hona kamoo empa hajoale ho se ho se hantle kaha le bana ba shoeleng ekasitana le tsona liphofolo li akheloa kamoo. Ba re ke tabatabelo ea bona hore bo loke kaha ba ne ba khona ho fumana mokhoa ho ja kamoo.
