ADV. SEHAPI O FA LIAKHENTE TŠEPO
Ka Moipone Makhemeng
La 17 ‘Mesa 2023
Ka Labohlano la 14 ‘Mesa 2023 Holong ea Liboka ea ‘Manthabiseng, Maseru, ho bile le ‘moka oa bophatlalatsi ba litaba le liakhente, moo Adv. Fusi Sehapi a neng a ilo beha sechaba leseling ka liqholotso tseo ba thulanang le tsona e le liakhente tšebetsong ea bona ekasitana le ho sheba hore na ba ka fumana phunyeletso joang ha ba ka mo khetha e le moporesitente oa Mokhatlo oa Liakhante Lesotho (Law Society of Lesotho)
Motsamaisi oa ‘moka e bile Adv. Mpeli Mohlaula ‘me eena o ile a fana liteboho ho bohle ba bileng teng sebokeng le ho fana ka sepheo sa ‘moka. A re sepheo ke ho tla ba le puisano e reretsoeng ntho e le ‘ngoe eo e leng mosebetsi o betere oa molao.
Adv. Mpeli Mohlaula
Ho sa le joalo, mabapi le mokhatlo o mocha o sa tsoa thehoa o bitsoang Lady Lawyers, Adv. Tšebeletso Motlotli o ile hlalosa hore ba kamorao ho Adv. Sehapi kaha ba tseba maputolo a hae.
A bontša hore liakhente li futsanehile kahara naha ea Lesotho ka hona ho sa natsehe liabo tseo ba li lefang a re Law Society e etelletsoe pele ke batho ba hanang ho tloha litulong ba ichebileng bobona feela ba sa shebe litlhoko tsa liakhente tse ling. Adv. Motlotli o bontšitse hape hore mokhatlo ona oa bona o sa tsoa thehoa ka la 29 Hlakubele 2023 empa o se o na le litho tse 207 ‘me sena se paka kamoo ba batlang phetoho ka teng.
Adv. Tšebeletso Motlotli
Ha a tsoelapele a bontša hore Adv. Sehapi ke eena motho eo ba nang le tšepo ho eena kaha a bontšitse lerato le khetholohileng mosebetsing ona. A totobatsa hore o buoa liphetoho tseo ba li laba-labeng ebile a sa bontše khethollo kapa tšekamelo.
Khabareng Adv. Sehapi le eena o ile a lotomanya liqholotso tseo ba thulanang le tsona ‘me hara tsona ebile ntlha eo a bontšitseng ha liakhente tsa Lesotho melao ea linaha tse ling e sa li lumelloe ho sebetsa linaheng tsa bona empa Lesotho lona le sa etse melao e joalo liakhente tse tsoang ka ntle li ikenela feela li sebetse.
A supa hore se mpefatsang le ho feta ke hore babuelli ba molao ba Afrika Boroa ba tla le babuelli ba bona ba banyenyane athe ho na le bacha ba bangata ba nang le bokhoni ba ka thusang ka hara naha eaba le bona ba khona ho beha bohobe tafoleng.
A supa hore sena se tla boela se khothalletse likamano tsa semolao tseo mokhatlo oa molao o li behang e le mosebetsi oa molao ho mokhatlo oa molao.
Sehapi a rapalatsa hore mokhatlo o hlokolosi oa molao o ka ikopanyetsa ‘maraka bakeng sa banna ba oona sechabeng, mekhatlong ea sechaba, mebusong le kantle ho naha eseng feela ho ba hama chelete eo ba se nang eona.
Advocate Sehapi o boetse a totobatsa hore eena ha a ka fumana monyetla oa ho etella-pele mokhatlo oa liakhente ka khetho ea liakhente o tla bona hore lillo tsena tseo ba buang ka tsona li tla sekeheloa tsebe. A re eena ha se motho ea buang ka molomo feela empa ke motho oa liketso.
Ha a tsoela-pele o bontšitse hore e ‘ngoe e ka sehloohong ke linyeoe tse sa feleng; tse lulang li teta makhotleng. O phethetse ka hore o tla bona hore tseo lia fela ‘me ba tla qala pele ka lipuisano empa ha li hloleha ba tla nka methati e meng ho tšoana le ho ea makhotleng a ka ntle.
